د طالبانو د کورنیو چارو وزارت وایي، د جنايي جرمونو پر وړاندې د مبارزې ځواکونو یې په شپږو ولایتونو کې ۱۶ تنه د بېلابېلو جرمونو په تړاو نیولي، او په بلخ کې یې لس غلا شوي موبایلونه بېرته خپلو اصلي مالکانو ته سپارلي دي.
د کورنیو چارو وزارت په خبرپاڼه کې ویلي، چې په جوزجان ولایت د آقچې ولسوالۍ کې نهه تنه د قمار کولو پر مهال نیول شوي دي. دغه راز، درې تنه د غلا په تور په هرات ولایت، دوه تنه په نیمروز ولایت د دلارام ولسوالۍ کې او یو بل تن په ننګرهار ولایت کې د د دوی له لوري نیول شوی دی.
د خبرپاڼې له مخې، د دایکندي ولایت په پاټو ولسوالۍ کې هم یو کس د تاریخي اثارو د غیرقانوني کیندنو په تړاو د جنايي جرمونو پر ضد د مبارزې ځواکونو نیولی دی.
بل لور ته، د بلخ ولایت د امنیه قوماندانۍ اړوند د جنايي جرمونو پر وړاندې د مبارزې ځواکونو په تېره یوه میاشت کې لس غلا شوي موبایلونه کشف کړي او بېرته یې خپلو اصلي مالکانو ته سپارلي دي.
وزارت وایي، د جنايي فعالیتونو پر ضد مبارزه به دوام لري او د قانون ماتونکو پر وړاندې به جدي چلند کېږي.
