د لومړۍ درجه ولایتي سیالۍ د ننګرهار لوبډلې په اتلولۍ پای ته ورسېدې
افغان کرېکټ بورډ اعلان وکړ، چې د ننګرهار لوبډلې د «وزیر اکبر خان» ولایتي لومړۍ درجه کرېکټ سیالیو د اتلولۍ لقب خپل کړ. دا سیالۍ د مرغومي په ۱۵مه په ننګرهار او خوست ولایتونو کې پیل شوې وې او په ننګرهار کې د نجیبالله ترهکي کرېکټ لوبغالي کې د پایلوبې په ترسره کېدو پای ته ورسېدې.
په پایلوبه کې د ننګرهار لوبډلې د غوره لوبې په وړاندې کولو سره، د ننګرهار-ب لوبډلې ته د ۱۲۴ منډو په توپیر ماتې ورکړه او د دې پړاو سیالیو د اتلولۍ جام یې پورته کړ.
د دغو سیالیو په پای کې د پکتیکا لوبډلې توپ وهونکي کرامتالله چې ۳۹۳ منډې یې کړې وې، د سیالیو د غوره توپ وهونکي لقب وګاټه. د لوګر لوبډلې توپ اچوونکی محمدالله لوګری د ۱۲ وېکټو په ترلاسه کولو سره د دغو سیالیو غوره توپ اچوونکی وپېژندل شو. همداراز د ننګرهار-ب لوبډلې لوبډلمشر نصیرخان د ۱۳ وېکټو او ۴۵ منډو په لرلو سره د غوره الراونډر جایزه ترلاسه کړه او د ننګرهار لوبډلې لوبغاړی عثمان یونس د ۱۳ وېکټو او ۶۴ منډو په کولو سره، د دغو سیالیو د غوره ځوان لوبغاړي په توګه معرفي شو.
په دغو سیالیو کې ۱۲ لوبډلو په دوو ګروپونو کې لوبې وکړې، چې هرې لوبډلې پنځه لوبې ترسره کړې او هر لوبغاړي لږترلږه په درېیو سیالیو کې ګډون درلود. د افغانستان کرېکټ بورډ د خبرتیا لهمخې، د دې سیالیو غوره لوبغاړي به د «میرویس نیکه» درې ورځنیو سیالیو او د «غازی امانالله خان» یو ورځنیو یا لېسټ «اې»سیالیو ته لاره ومومي.
