ایران انټرنشنل د ایډیټوریل بورډ په یوه اعلامیه کې د نویو اسنادو او روایتونو په استناد اعلان کړی چې د ایران د لاریونونو پر مهال ایراني ځواکونو تر لومړنیو اټکلونو ډېر پراخ او له ۳۶زره او ۵۰۰ څخه زیات کسان وژلي دي.
ایران انټرنشنل ته رسېدلي معلومات د ځپنې د څرنګوالي، د نښتو د جغرافیایي پراختیا او د امنیتي ځواکونو د چلند په اړه لا روښانه انځور وړاندې کوي او له محاکمې پرته اعدامونه، په ډزو د ټپیانو ویشتل او په روغتیایي مرکزونو کې د امنیتي ځواکونو مستقیمه مداخله افشا کوي.
د دغو موندنو ټولګه ښيي هغه څه چې د ایران د ملي انقلاب پر مهال پېښ شوي، یو پراخ او له مخکې طرحه شوی جنایت دی چې ثبت، مستندسازي او نړیوال تعقیب ته اړتیا لري.
لاندې د دغو پېښو بشپړ متن او مستند جزییات وړاندې کېږي:
د مرغومي پر ۱۸ او ۱۹مه له مخکې پر طرحه شوي جنایت له دوو اوونیو تېرېدو ، او د ایران انټرنشنل د ایډیټوریل بورډ د لومړۍ اعلامیې تر خپرېدو وروسته، دغه رسنۍ ته د اسنادو، محرمو او میداني راپورونو نوې څپه، او همداراز د روغتیايي کارکوونکو، عیني شاهدانو او د وژل شویو د کورنیو روایتونه رسېدلي دي، چې د اسلامي جمهوریت له لوري د څه باندې ۳۶زره او ۵۰۰ایراني وګړو د وژل کېدو کیسه کوي.
نوي معلومات د وژنو د بڼې او د جنایت د ابعادو لا دقیق انځور وړاندې کوي؛ داسې جنایت چې اوس په ډاډ سره ویل کېدای شي، د نړۍ په تاریخ کې د دوو ورځو په موده کې پر سړکونو د خلکو تر ټولو لوی او خونړی قتلعام دی.
په همدې حال کې، داسې ټکان ورکوونکي راپورونه او شواهد هم ترلاسه شوي چې په تهران او ولایتونو کې د یو شمېر نیول شویو کسانو له محاکمې پرته د اعدام خبر ورکوي.
له مړستونونو خپاره شوي انځورونه هېڅ شک نه پرېږدي چې یو شمېر ټپیان، په داسې حال کې چې په روغتونونو کې بستر او تر درملنې لاندې وو، ټول په ډزو ویشتل شوي دي.
دا روښانه ده چې که دغه کسان په کوڅو کې پر سر په ډزو لګېدلي وای او سرونه یې ټوټه ټوټه شوي وای، نو اساساً به د هغوی روغتون ته د لېږد او د درملنې د پیل هېڅ دلیل نه و موجود.
ترلاسه شوي انځورونه په ښکاره ډول ښيي چې د ځینو جسدونو سره لا هم د ناروغ د څارنې پایپونه او طبي وسایل نښتي پاتې دي.
همداراز، د ځینو نورو جسدونو پر سینه د زړه د څارنې الکترودونه ښکاري؛ هغه شواهد چې ښيي دا کسان پرسر له ویشتل کېدو مخکې تر طبي څارنې لاندې وو.
ایران انټرنشنل سره یو شمېر ډاکټرانو او نرسانو هم په خپلو خبرو کې د ټپیانو په ډزو ویشتل تایید کړي دي.
د امنیتي ادارو د راپورونو له مخې د وژل شویو شمېر:
د ایران انټرنشنل ایډیټوریل بورډ مخکې، د لسمې میاشتې په ۲۳مه، اعلان کړی و چې د اسلامي جمهوریت امنیتي سرچینو په خپلو داخلي راپورونو کې د وژل شویو لومړنی شمېر لږ تر لږه ۱۲زره کسان ښودلی و.
دا شمېر په مشخص ډول د مرغومي میاشتې له ۱۹ تر ۲۱مې نېټې د قتلعام دوه ورځې وروسته، د سپاه پاسداران د استخباراتو د سازمان له لوري د ملي امنیت عالي شورا او د ولسمشرۍ دفتر ته په سپارل شوي راپور کې یاد شوی و.
ایران انټرنشنل وایي چې اوس یې لا مفصلو معلوماتو ته لاسرسی موندلی چې د سپاه پاسداران د استخباراتو له خوا د ملي امنیت عالي شورا ته وړاندې شوي دي.
په راپور کې راغلي چې نورو حکومتي ادارو هم له بېلابېلو امنیتي بنسټونو څخه بېلابېلې شمېرې ترلاسه کړې دي، خو د پراخ قتلعام، قصدي پټولو، د جسدونو د ثبت او سپارلو په بهیر کې د ګډوډۍ، پر کورنیو د امنیتي فشارونو او په ځینو مواردو کې د وژل شویو د پټ ښخولو له امله، داسې ښکاري چې حتا امنیتي ادارې هم تر اوسه د وژل شویو له دقیق او وروستي شمېر څخه خبرې نه دي.
په هغه راپور کې چې د چهارشنبې په ورځ، د ایران د اسلامي شورا مجلس د ملي امنیت او بهرني سیاست کمېسیون ته وړاندې شوی، د وژل شویو شمېر لږ تر لږه ۲۷زره او ۵۰۰کسان ښودل شوی دی.
د هغو باوري معلوماتو له مخې چې د اسلامي جمهوریت د کورنیو چارو وزارت له سرچینو څخه ایران انټرنشنل ته رسېدلي، د ولایتونو د امنیتي شوراګانو د معلوماتو تر راټولولو وروسته، د مرغومي میاشتي۳۰مې نېټې پورې د وژل شویو شمېر له ۳۰زرو اوښتی دی.
همداراز، د ایران د ملي امنیت عالي شورا دوو باخبره سرچینو ایرانانټرنشنل ته ویلي چې د سپاه پاسداران د استخباراتو په وروستیو دوو راپورونو کې د وژل شویو شمېر په ترتیب سره له ۳۳زرو او له ۳۶زره او ۵۰۰څخه زیات یاد شوی دی.
د ایران د کورنیو چارو وزارت په راپورونو کې راغلي چې امنیتي ځواکونو په څه باندې ۴۰۰ښارونو او ولسوالیو کې له لاریون کوونکو سره نښتې کړې او په ټول هېواد کې د نښتو سیمې له ۴زرو څخه زیاتې ثبت شوې دي.
سره له ټولو ګډوډیو او پټولو، په محرمو حکومتي راپورونو کې د وژل شویو د شمېر چټک زیاتوالی دا اندېښنه پیاوړې کوي چې ښايي اصلي شمېر تر دې هم لوړ وي.
د مخابراتي محدودیتونو او امنیتي فشارونو له امله لا هم کره او خپلواک شمېر ته لاسرسی ممکن نه دی، خو د روغتونونو د سرچینو او عیني شاهدانو پر بنسټ، د ځینو لویو ښارونو د وژل شویو شمېر ټکان ورکوونکی او وېروونکی دی.
د روغتیایي سرچینو د محتاطانه راټولو شوو معلوماتو له مخې، چې روغتونونو او روغتیايي مرکزونو ته د سپارل شویو جسدونو پر شمېر ولاړ دي، رشت ښار کې له ۲۵۰۰زیات، په مشهد کې لږ تر لږه ۱۸۰۰، په اصفهان، نجف اباد او خوراسګان کې له ۲۰۰۰زیات، په کرج، شهریار او شهرک اندیشه کې لږ تر لږه ۳۰۰۰، په کرمانشاه کې ۷۰۰او په ګرګان کې ۴۰۰کسان وژل شوي دي.
تر اوسه په تهران کې د ټولو وژل شویو کره شمېر نه دی ترلاسه شوی، خو د کهریزک او د تهران د روغتونونو خپاره شوي انځورونه ښيي چې په پلازمېنه کې زرګونه کسان وژل شوي، چې ډېری یې د تهران په جنوب کې وو.
د یوه تاریخي جنایت وېرونکي جزییات:
۱: درې ډاکټران او څلور نرسان، چې په تهران کې یې له ایران انټرنشنل سره خبرې کړې، وايي امنیتي ځواکونو روغتونونو ته په ورتګ سره یو شمېر هغه ټپیان له ځان سره وړي چې تر درملنې لاندې وو.
ترلاسه شوي انځورونه او په ټولنیزو رسنیو کې خپرې شوې ویډیوګانې ښيي چې د ځینو هغو جسدونو پر کوپړیو د مرمیو نښې شته چې په روغتون کې د بستر کېدو څرګندې نښې لري.
دوو نورو نرسانو ویلي، کله چې یو ټپي ځوان د تهران په لوېدیځ کې د یوې نښتې له سیمې امبولانس ته ولېږدول شو، یو امنیتي مامور امبولانس ته ننوت او د دوی د سترګو پر وړاندې یې په پرلهپسې دوو ډزو د هغه ژوند پای ته ورساوه.
د دوی په وینا، دغه ځوان امبولانس ته د لېږد مخکې سخت وهل شوی و او نیمه بېهوښه و.
یو متخصص او باوري ډاکټر په یوه روغتون کې د دغو دوو نرسانو روایت تایید کړی دی.
همداراز داسې راپورونه هم شته چې ځینې کسان په خپلو کورونو کې نیول شوي او وروسته یې کورنیو ته ویل شوي چې د جسد ترلاسه کولو لپاره کهریزک ته مراجعه وکړي.
ځینې نور راپورونه وايي چې امنیتي ځواکونو کورونو ته د ورتګ او د خلکو د دروازې مخې ته د کسانو له راایستلو وروسته، حتا د پوست د کڅوړې د سپارلو په پلمه، پر هغوی ډزې کړې او وژلي یې دي.
دغه ټول ژور اندېښمنوونکي راپورونه په وروستیو ورځو کې د کورنیو له خوا خپاره شوي او یا د باوري عیني شاهدانو له لوري ایران انټرنشنل ته سپارل شوي دي.
که دا روایتونه د خپلواکو څېړنو له لارې تایید شي، نو دا پېښې په ښکاره ډول «له عدلي بهیره بهر وژنې» بلل کېږي او که پراخې وي، د «بشریت پر ضد جنایت» تر سرلیک لاندې څېړل کېدای شي.
د نیول شویو د شمېر پټ ساتل، د توقیف ځایونو نامعلوم وضعیت او بندیانو ته د طبي مرستو او وکیل ته د لاسرسي نشتوالی، د بشري حقونو ګڼ فعالان ژور اندېښمن کړي دي.
یو پېژندل شوی وکیل، چې نه یې غوښتل نوم یې یاد شي، روان وضعیت «دبشري حقونو یو نړیوال کړکېچ» وباله.
هغه وویل:«نا رسمي راپورونه د لسګونو زرو کسانو د نیول کېدو کیسه کوي، او سپاه یا هر هغه امنیتي بنسټ چې دا کسان ورسره دي، کولای شي هر څو کسان چې وغواړي ووژني او جسدونه یې کهریزک یا نورو مړستونونو ته ولېږي او ادعا وکړي چې دا کسان په کوڅو کې وژل شوي دي.»
۲: په ټول ایران کې له مخکې پلان شوی قتلعام ښيي چې دا بېرحمانه ځپنه د ټولو حکومتي بنسټونو په همغږۍ او د اسلامي جمهوریت د لوړپوړو چارواکو په امر ترسره شوې ده.
د ایران انټرنشنل د معلوماتو له مخې، د علي خامنه یي د ۱۹مې نېټې له وینا وروسته، د سپاه پاسداران د لوړپوړو قوماندانانو په غونډو کې د «النصر بالرعب» او «وقاتلو هم حتی لا تکون فتنه» اصطلاحات کارول شوي؛ هغه اصطلاحات چې په همدې ورځ د موسومو «ارزشي» ډلو په ټیلیګرامي کانالونو کې هم خپاره شول.
۳: ګڼ راپورونه ښيي چې په ډېرو ښارونو کې د وژل شویو له کورنیو څخه د خپلو عزیزانو د جسدونو د ورسپارلو په بدل کې، د حق التیر(د مرمۍ قیمت)تر نوم لاندې لوړې پیسې اخیستل شوې دي.
په ځینو مواردو کې، د کورنیو له مخالفت سره سره، وژل شوي کسان د بسیج د غړو په توګه ثبت شوي دي.
۴: که څه هم د قتلعام ډېره برخه د سپاه پاسداران او بسیج له لوري شوې، خو ایرانانټرنشنل ته رسېدلي معلومات ښيي چې د عراق او سوریې د اسلامي جمهوریت نیابتي ځواکونه هم په دې ځپنه کې کارول شوي دي.
د غیر بومي ځواکونو کارول ښيي چې د ځپنې د ظرفیت د چټک زیاتولو پرېکړه شوې وه.
ایران انټرنشنل وایي چې که نويو معلوماتو ته لاسرسی ومومي، په راتلونکو اعلامیو کې به یې له خپلو مخاطبانو سره شریک کړي.
د اسنادو د ورلېږلو غوښتنه:
ایرانانټرنشنل په خپل راپور کې یو ځل بیا له ټولو ایرانیانو، د هېواد دننه او بهر، غوښتي چې هر ډول اسناد، ویډیوګانې، انځورونه، غږیز روایتونه، د وژل شویو او ټپیانو معلومات، روغتیايي مرکزونه، د نښتو ځایونه، د پېښو وخت او ځای، او هر هغه جزییات چې د تایید وړ وي، له دوی سره شریک ګړي.
ایران انټرنشنل ویلي چې د سرچینو خوندیتوب او د معلوماتو محرمیت د دوی مطلق لومړیتوب دی. که د خپل امنیت په اړه اندېښنه لرئ، د خپل هویت له شریکولو ډډه وکړئ او یوازې عمومي او د تایید وړ معلومات راولېږئ.ایران انټرنشنل به تر کره ارزونې او تایید وروسته خپلې موندنې خپرې کړي او د نړۍ له ټولو اړوندو نړیوالو بنسټونو سره به یې شریکې کړي.
حقیقت به ثبت او مستند شي، د وژل شویو نومونه به خوندي پاتې شي، او دا جنایت به په چوپتیا کې نه ښخېږي.
