بهرنیو هوايي شرکتونو ته د اسراییل خبرداری: د اوونۍ له وروستۍ څخه حساس پړاو پیلېږي
په داسې حال کې چې د امریکا او ایران ترمنځ ترینګلتیاوې کړکېچن پړاو ته رسېدلي، د اسراییل د ملکي هوايي چلند ادارې مشر د یکشنبې په ورځ د بنګوریون په هوايي ډګر کې فعالو بهرنیو هوايي شرکتونو ته په یوه رسمي لیک کې خبرداری ورکړ، چې سیمه د دې اوونۍ په وروستیو کې یوه «حساس پړاو» ته ننوځي.
شموییل زاکای لیکلي، سره له دې چې الوتنې اوسمهال «باثباته» دي، خو اوسنۍ ارزونې د دې اوونۍ وروستیو کې د «ګواښ په کچه د پام وړ بدلون» ښودنه کوي.
په دغه لیک کې همدارنګه د اسراییل د هوايي قلمرو د احتمالي تړل کېدو لپاره یوه بېړنۍ طرحه تشرېح شوې ده؛ هغه سناریو چې د سرچینې په وینا د ۲۰۲۵ کال په جون کې او څو ځلې په ۲۰۲۴ کال کې پېښه شوې وه.
د دغې طرحې پر بنسټ، د هوايي قلمرو د تړل کېدو په صورت کې د اسراییل د ملکي هوايي چلند اداره ژمنه کړې، چې بهرنیو الوتکو ته به د وتلو لومړیتوب ورکوي، ترڅو په لومړنیو ممکنه فرصتونو کې له اسراییل څخه ووځي.
زاکای په خپل لیک کې لیکلي: «زموږ ارزونه دا ده چې د اوونۍ پای ښايي د یوې حساسې دورې پیل وي». هغه همداراز ټینګار وکړ، چې دا اداره اوسمهال د کورنۍ جبهې د قوماندانیو له لارښوونو سره سم عمل کوي؛ هغه لارښوونې چې لا هم د عادي ملکي الوتنو د دوام اجازه ورکوي.
