د طالبانو د دفاع وزارت ویلي، چې د بادغیس په جوند، د پروان په جبل السراج او سالنګونو او د فاریاب په لولاش ولسوالیو کې یې لسګونه هغه کسان د چورلکو په وسیله ژغورلي، چې د درنو واورو له امله په لارو کې بند پاتې وو.
د طالبانو د دفاع وزارت ویلي، چې په واورو کې بنند پاتې کسان یې خوندي سیمو ته لېږدولي دي.
په یادو کسانو کې ناروغه ښځې هم شاملې وې.
طالبانو زیاته کړې، چې په ځینو سیمو کې یې په واورو کې بند پاتې څاروي هم ژغورلي دي.
د افغانستان لپاره د ناروې کمېټې عمومي رييس د طالبانو له پېښو سره د مبارزې چمتووالي ادارې رييس سره په کتنه کې وویل، روان کال د افغانستان لپاره د ناروې کمېټې د ۴ کلنې ستراتېژۍ وروستی کال دی. د طالبانو دغه چارواکي هم وویل، په هېواد کې د موسساتو لپاره د هر ډول فعالیت زمینه برابره ده.
د افغانستان لپاره د ناروې کمېټې عمومي رييس تاریا مګنوسن واټرډال او مل پلاوي یې د یکشنبې په ورځ (د سلواغې ۵مه) د طالبانو له پېښو سره د مبارزې چمتووالي ادارې له رییس نورالدین ترابي سره په کتنه کې وویل، د افغانستان لپاره د ناروې کمېټه تر ډېره پر اوږد مهالو پروګرامونو کار کوي او خپله ستراتېژي هم د څلورو کلونو لپاره جوړوي. هغه زیاته کړه، چې روان کال د دې کمېټې د اوسنۍ ستراتېژۍ وروستی کال دی.
له پېښو سره د مبارزې چمتووالي رييس په دې کتنه کې وویل، چې دې ادارې له زیانمنو کسانو لپاره د مرستو د همغږۍ د مسوولیت لهمخې، د پېښو د مدیریت او زیانمنو ته د مرستې په برخه کې د لومړیتوبونو او اړتیاوو لړلیک ترتیب کړی، څو هغو مؤسسو ته چې غواړي په دې برخه کې فعالیت وکړي، د تمویل کوونکو لپاره د پروپوزلونو په برابرولو کې لازمې اسانتیاوې برابرې شي.
د افغانستان لپاره د ناروې کمېټې عمومي رييس وویل، د راتلونکې ستراتېژۍ د تدوین پر مهال به له دې ادارې سره د همغږۍ ناستې ترسره شي.
نورالدین ترابي همداراز په ډاګه کړه، چې د بشري مرستو او همدارنګه د بنسټیزو پروژو د پلي کولو او د پېښو د خطرونو د کمولو په برخو کې، د مرکز او ولایتونو په کچه د ټولو بنسټونو لپاره د هر ډول فعالیت زمینه برابره ده.
د طالبانو د ریاستالوزرا مرستیال مولوي عبدالسلام حنفي ویلي، چې ګاونډیو هېوادونو افغان کډوال د خدای لپاره نه، بلکې د خپلو سیاسي او اقتصادي ګټو لپاره منلي وو. هغه زیاته کړې، چې که ګاونډیانو د خدای د رضا لپاره دا کار کړی و، نو اوس به یې له کډوالو سره داسې ناوړه چلند نه کاوه.
مولوي حنفي دا څرګندونې په سرپل ولایت کې د راستنېدونکو کډوالو لپاره د مرستو د وېش د پیل په مراسمو کې وکړې.
نوموړي وویل، چې د ګاونډیانو له خوا د افغان کډوالو اوسنی جبري ایستل د اسلامي ارزښتونو، د ګاونډیتوب د اصولو او همدارنګه د نړیوالو قوانینو خلاف عمل دی.
د حنفي په وینا، افغان کډوال له کلونو راهیسې په ګاونډیو هېوادونو کې له بېلابېلو ستونزو، تبعیض او محدودیتونو سره مخ وو، خو سره له دې بیا هم د کوربه هېوادونو له لوري د هغوی له شته والي څخه د بېلابېلو ګټو لپاره استفاده کېده.
هغه زیاته کړه، چې طالبان د راستنېدونکو کډوالو د ستونزو د حل، د هغوی د بیا مېشتېدو او لومړنیو اړتیاوو د پوره کولو لپاره هڅې کوي او اړوندو ادارو ته یې لارښوونه کړې، چې له راستنو شویو کورنیو سره لازمې مرستې وکړي.
مولوي عبدالسلام حنفي له نړیوالو بنسټونو او مرستندویو ادارو وغوښتل، چې له افغان کډوالو سره بشري مرستې زیاتې کړي او د هغوی د انساني کرامت درناوی وکړي.
د یادونې وړ ده، چې په وروستیو میاشتو کې زرګونه افغان کډوال له ځینو ګاونډیو هېوادونو او په ځانګړي ډول له پاکستان او ایران څخه په جبري ډول هېواد ته راستانه شوي، چې ډېری یې د سرپناه له نشتوالي او جدي اقتصادي ستونزو سره مخ دي.
ځایي سرچینو افغانستان انټرنشنل- پښتو ته ویلي چې د سلواغې پر ۴ نېټه د ننګرهار ولایت د غني خېلو ولسوالۍ اړوند «۲۵ ویالې» سیمه کې یو طالب وسله وال د خپل ورور له خوا په ډزو وژل شوی دی.
د سرچینو په وینا، وژل شوی طالب وسله وال عبدالوهاب نومېده او د کورني اختلاف له امله د خپل ورور له خوا وژل شوی دی.
دوی زیاتوي، د پېښې له کېدو وروسته د عبدالوهاب ورور له سیمې تښتېدلی او تر اوسه یې د نیول کېدو په اړه څرګند معلومات نشته.
په ننګرهار کې د طالبانو ځایي چارواکو تر دې مهاله د یادې پېښې په تړاو په رسمي ډول څه نه دي ویلي.
دا په داسې حال کې ده، چې تر دې وړاندې هم د نږدې کسانو او خپلوانو له خوا د طالبانو د ځینو غړو د وژل کېدو پېښې راپور شوې دي.
د طالبانو د کورنیو چارو وزارت وایي، د نشهيي توکو پر وړاندې د مبارزې پولیسو یې د هېواد په ۱۳ ولایتونو کې د عملیاتو پر مهال۶۲ تنه د نشهيي توکو د قاچاق او پلور په تړاو نیولي دي.
د یاد وزارت د معلوماتو له مخې، دغه کسان په کابل، بلخ، پنجشېر، جوزجان، فراه، نیمروز، خوست، سمنګان، کاپیسا، غزني، پروان، سرپل او زابل ولایتونو کې د شویو عملیاتو پر مهال نیول شوي دي.
خبرپاڼه زیاتوي، له نیول شویو کسانو سره نږدې دوه زره نشهيي ټابلیټونه، همدارنګه یوه اندازه شیشه، چرس، الکولي مشروبات او تیزاب هم نیول شوي دي.
د طالبانو په وینا، د نشهيي توکو پر ضد مبارزه د دوی له لومړیتوبونو څخه ده او امنیتي ځواکونه به د قاچاق او پلور پر ضد خپلې هڅې لا پسې چټکې کړي.
تر اوسه د نیول شویو کسانو د هویت، د قضیو د څرنګوالي او د هغوی د احتمالي محاکمې په اړه جزییات نه دي خپاره شوي.
پخواني جهادي مشر عبدالرب رسول سیاف په خپلو تازه څرګندونو کې پر طالبانو غږ کړی، چې « له خدایه ووېریږئ او ددین لارښوونې سرچپه مه ښیئ». سیاف وايي، چې که «په اسلام کې کوم امتیاز موجود وي، هغه د بېوزلو او بېوسه خلکو لپاره دی، نه د شتمنو، پانګوالو او خانانو لپاره».
عبدالرب رسول سیاف، چې د طالبانو د سیاستونو تر ټولو سخت منتقد ګڼل کیږي، د یکشنبې په ورځ، د سلواغې پر پنځمه پر خپلو ټولنیزو شبکو ولیکل، چې « د کابل واکمنانو، له خدایه وویریږئ او دیني لارښوونې سرچپه مه ښیئ».
سیاف وايي، چې اسلام د عدالت او انصاف دین دی او زیاته کړې یې ده، چې که په کوم ځای کې امتیاز هم مطرح شوی وي، هغه د بې وزله او بې وسه خلکو لپاره دی، خو د پانګوالو، خانانو او بډایو لپاره نه دی.
د طالبانو د محاکمو د اصولنامې پر اساس، طالبانو د «باغي» ګڼل شویو کسانو د وژلو حکم صادر کړی دی. طالبانو په دې اصولنامه کې ویلي چې د «باغي» زیان عام دی او پرته له وژنې نه اصلاح کیږي.
طالبانو په جزایي اصولنامه کې د «غلام» کلمه څو ځله کارولې او په څو مواردو کې یې ددې اړوند حقوق په رسمیت پېژندلي دي. په ۱۵مه او ۴مه ماده کې دې ته اشاره شوې ده.
په نړیوالو حقوقو کې غلامي په هر ډول او بشپړ ډول منع ده.
په اصولنامه کې راغلي: «هر جرم ته چې حد نه وي ټاکل شوی، د تعزیر له مخې پرې حکم کېږي، که جرم کوونکی ازاد وي یا غلام».
د شنونکو او منتقدانو په باور، طالبانو ټولنه پر علماوو، اشرافو، منځنۍ او ټېټې طبقې ویشلې ده.
په اصولنامه کې د جرم ترسره کول، د مجازاتو ډول او شدت د افرادو د ټولنیز مقام پر اساس ټاکل شوي دي.
دې اصولنامې د ګڼو کونیو او بهرنیو بنسټونو و د حقونو د فعالانو نیوکې را پارولې دي.
دغه اصولنامه د طالبانو مشر توشیح کړې ده او ددې ډلې په قضايي ادارو او محاکمو کې پلې کیږي.