د طالبانو د رياست الوزرا اداري مرستيال عبدالسلام حنفي فاریاب ولایت ته د سفر په لړ کې د یاد ولایت له یو شمېر تاجرانو او پانګوالو سره په کتنه کې غوښتنه کړې، چې افغان سوداګر دې په دې سړه هوا کې له را ستنو شویو افغانانو سره د خپل توان په کچه مرستې وکړي.
د طالبانو ریاست الوزرا خبر ورکړی، چې ددې ډلې اداري مرستیال عبدالسلام حنفي په هیواد کې د سوداګرۍ او پانګونې د ښو فرصتونو رامنځته کېدل د زیاتو داخلي او بهرنیو تاجرانو او پانګوالو د هڅونې لامل بللی.
حنفي ویلي، چې دوی اقتصادي ودې او په هیواد کې د پرمختګ د زمینو رامنځته کېدو ته ژمن دي او کوښښ کوي په دې برخه کې ارزښتناک اقدامات وکړي.
عبدالسلام حنفي همدارنګه د راستنو شویو کډوالو موضوع ته اشاره کړې او له تاجرانو او پانګوالو یې غوښتي چې د خپل توان په اندازه له کډوالو سره مرسته وکړي څو سوړ ژمی له ستونزو پرته تېر کړي.
په دې وروستیو له ایران او پاکستان څخه د افغان کډوالو اېستلو پروسه چټکه شوې ده او د سختې سړې هوا له امله راستانه شوي کډوال له سختو مالي مشکلاتو سره مخ دي.
