لوړپوړی چینایي جنرال 'امریکا ته د اټومي رازونو په افشا کولو' تورن شو
وال سټریټ ژورنال د خپلو سرچینو په حواله راپور ورکړی، چې د چین تر ټولو لوړپوړی جنرال ژانګ یوشیا د دغه هېواد د اټومي وسلو د پروګرام په اړه د معلوماتو په خپرولو او د بډو په اخیستلو تورن شوی دی.
دغه چیني جنرال د ولسمشر شي جېنپېنګ له نږدې کسانو شمېرل کېده او د نړۍوالو لوړپوړو چارواکو سره یې هم لیدنې ترسره کړې وې. د والسټریټ ژورنال د راپور له مخې؛ ژانګ یوشیا د چین د پوځ یو له لوړپوړو چارواکو څخه و، چې د روسیې ولسمشر ولادیمیر پوتین او د دغه هېواد د دفاع وزیر سره یې د کار په اوږدو کې لیدنې کړې وې.
د چین د دفاع وزارت د شنبې په ورځ تایید کړه، چې نوموړی اوس د جدي سرغړونو په اړه تر څېړنې لاندې دی. د یاد وزارت د بیان له مخې؛ دغه اقدام د ولسمشر شي جېنپېنګ د فساد ضد کمپاین برخه ده، چې له ۲۰۱۲کال راهیسې یې د ۲۰۰زره لوړپوړو چارواکو په ګډون له بېلابېلو کسانو څېړنې کړې دي.
د خبرونو ارزوونکو په باور؛ دغه څېړنه د چین د کورني امنیت او د لوړپوړو پوځي چارواکو د روڼتیا په موخه ترسره کېږي او د نړۍوالو اړیکو لپاره هم پراخې اغېزې لرلای شي.
