د طالبانو په ولکه کې د افغانستان برېښنا شرکت وایي چې د متحده عربي اماراتو د «ایچ ایچ ایم» په نوم کمپنۍ په افغانستان کې د ۱۰۰۰ مېګاواټه ګازي برېښنا د تولید په برخه کې پانګونې ته لېوالتیا ښودلې ده.
برېښنا شرکت په یوه خپره کړې خبرپاڼه کې ویلي، چې د دغه شرکت اجرایوي مشر ملا عبدالحق همکار نن په کابل کې د «ایچ ایچ ایم» کمپنۍ له مشر تانکوت داشد میر سره لیدلي او د ګازو پر بنسټ د برېښنا تولید پروژو، د پانګونې شرایطو، او د راتلونکي لپاره د تخنیکي همکاریو په اړه یې هر اړخیزې خبرې کړې دي.
خبرپاڼه زیاتوي، چې ملا همکار د «ایچ ایچ ایم» کمپنۍ مشر ته داډ ورکړی چې اوس د پانګونې لپاره مناسب شرایط برابر شوي او پانګوال کولای شي په ډاډه زړه د برېښنا تولید او بنسټونو جوړولو برخو کې خپلې پانګونې وکړي.
دوی ویلي چې د « ایچ ایچ ایم» کمپنۍ استازو په لومړي پړاو کې د ۱۰۰۰مېګاواټه برېښنا تولید لپاره خپل چمتووالی څرګند کړی او له طالب اړخ سره د ګډو تخنیکي بحثونو د دوام ډاډ یې ورکړی دی.
د طالبانو په ولکه کې افغانستان برېښنا شرکت له لوري ویل شوي چې دا ډول پانګونې د هېواد د انرژۍ سکتور پرمختګ او د برېښنا په برخه کې ځان بساینې لپاره مهم ګامونه بلل کېږي.
