په میدان وردګ کې د طالبانو تر واک لاندې له پېښو سره د مبارزې او چمتووالي ریاست خبر ورکړی، چې د دغه ولایت په نرخ ولسوالۍ کې د وروستیو ورښتونو او سړې هوا له امله یو ۱۳کلن ماشوم مړ شوی او د واورې ښویېدنې له امله ۷ کورونه ویجاړ شوي دي.
په میدان وردګ کې د طالبانو تر واک لاندې له پېښو سره د مبارزې او چمتووالي رییس مولوي احمدشاه ذهین ویلي، چې د واورې ښویېدنې له امله دوه کورونه په بشپړ ډول او پنځه هغه برسېرن ویجاړ شوي دي.
نوموړي ویلي، چې د دغه ولایت په ټولو ولسوالیو کې د فرعي لارو پرانیستلو هڅې روانې دي. دا په داسې حال کې ده، چې د درنې واورې له کبله د میدان وردګ ولایت د ټولو ولسوالیو لارې تړل شوې وې.
د طالبانو تر واک لاندې له پېښو سره د مبارزې او چمتووالي وزارت وایي، د افغانستان په بېلابېلو ولایتونو کې تر دې دمه د درنې واورې له کبله له ۶۰ زیات کسان مړه او شاوخوا ۱۱۰ نور ټپیان شوي دي.
