د ماشومانو د خوندیتوب ادارې ویلي، چې په افغانستان کې درنو واورو او سړې هوا د هغو زرګونو ماشومانو روغتیايي خطرونه زیاته کړي، چې په خیمو کې اوسېږي. په افغانستان کې د وروستیو زلزلو او د سرپناه د نهلرلو له امله یو شمېر کورنۍ لا هم په خیمو کې شپې او ورځې تېروي.
د ماشومانو د خوندیتوب نړۍوالې ادارې د دوشنبې په ورځ (د سلواغې ۶مه) ویلي، د افغانستان په ختیځو ولایتونو کې درنو واورو او سړې هوا د هغو زرګونو ماشومانو ژوند له خطر سره مخ کړی، چې په خیمو کې اوسېږي.
په افغانستان کې د ماشومانو د خوندیتوب ادارې رییس بوجار هوکسا وايي: «د افغانستان په ختیځو زلزله ځپلو برخو کې تر صفر ټېټه تودوخه او واوره د ماشومانو ژوند له خطر سره مخ کوي. پنځه میاشتې وروسته له هغه چې زلزلې په کونړ کې ژوند او معیشت له خلکو واخیست، ډیری ماشومان او د هغوی کورنۍ لا هم خیمې د خپل کور په توګه کاروي. یوازې ترپالونه هغوی له درنې واورې، سړو بادونو او ټیټې تودوخې څخه ساتي».
نوموړي ویلي، چې سړې هوا پر ماشومان اغېزه کړې او ماشومان یې د تنفسي ناروغیو په ځانګړې توګه د سینه و بغل پر وړاندې خورا کمزوري کړي دي.
دا په داسې حال کې ده، چې په روانه اوونۍ کې د افغانستان په ګڼو ولایتونو کې د درنو واورو له امله څه بادې ۷۰ کسان مړه شوي او له ۱۰۰ څخه ډېر نور ټپیان شوي دي.
