د اسوشېتېد پرېس خبري اژانس د راپور لهمخې، له شنبې تر دوشنبې پورې په امریکا کې د سخت ژمني توپان، زیاتې یخنۍ او واورو له امله ۲۸ کسان مړه شوي دي. دغه ناورین د دې هېواد په سویلي ایالتونو کې رامنځته شوی او له امله یې د سلګونه زره کورونو او د سوداګریزو مرکزونو برېښنا هم پرې شوې ده.
د امریکا د هوا پوهنې ملي ادارې ویلي، چې د دغه هېواد په ځینو برخو، په ځانګړي ډول په پنسلوانیا ایالت کې تر ۵۰ سانتيمتره پورې واوره ورېدلې ده. د یادې ادارې په وینا، سخته یخني او ساړه بادونه به د دوشنبې تر ناوخته او د سېشنبې تر ورځې دوام ولري.
د اسوشېتېد پرېس د راپور لهمخې، د امریکا په سویلي سیمو کې له یخ سره ګډ باران د ونو څانګې ماتې کړي او د برېښنا ستنې یې راغورځولې دي. د برېښنا ډېری پرې کېدنې په سویلي سیمو کې ثبت شوې دي، چې پهکې د مسیسيپي شمالي برخې او د ټېنسي ایالت ځینې سیمې شاملې دي.
د دوشنبې تر ماسپښینه، په ټوله امریکا کې د ۷۵۰ زره پورې د برېښنا پرې کېدو پېښې ثبت شوې دي.
دغه ژمني توپان لا هم د خلکو تګ راتګ او سفرونه له جدي ستونزو سره مخ کړي دي. د اسوشېتېد پرېس د معلوماتو لهمخې، یوازې د دوشنبې په ورځ په امریکا کې له ۸ زرو څخه زیاتې الوتنې ځنډېدلي یا لغوه شوي او د یکشنبې په ورځ د ټول هېواد ۴۵ سلنه الوتنې لغوه شوې وې.
