په هرات ښار کې یوازې په تېره یوه اونۍ کې لږ تر لږه اووه کسان وژل شوي دي. وروستۍ دوه پېښې د شنبې او یکشنبې په ورځو کې وشوې، چې دوه تنه پکې ووژل شول. د یوه په اړه محلي سرچینو افغانستان انټرنشنل ته وویل چې د طالبانو استخباراتو ته یې کار کاوه او بل، طالبانو وویل چې غل و.
په هرات ښار کې د تېرو څو ورځو وژنو د خلکو اندېښنې ډېرې کړې او داسې ښکاري چې ښار د امنیت له نظره ورځ تر بلې ناامنه کېږي.
یوازې په تېره یوه اونۍ کې لږ تر لږه اووه کسان بېلابېلو سیمو کې وژل شوي، چې د ډېری پېښو عاملان تراوسه نه دي په ګوته شوي.
د یکشنبې د مازیګر پر مهال، د سلواغې پر پنځمه، یو تن د هرات په ښار کې ترور شو.
افغانستان انټرنشنل ته په رسېدلې ویډیو کې ښکاري چې د نوموړي مړی پر سړک پروت دی او د طالبانو غړي ترې راټول شوي دي. تر اوسه د دې پېښې د عاملینو هویت نه دی څرګند شوی.
له دې وړاندې د دوشنبې په ورځ، د مرغومي پر ۲۹مه، د قدیر په نوم د یوه ځوان مړی وموندل شو، چې د وژل کېدو څرنګوالی یې لا هم ناڅرګند دی.
همداراز، د جمعې په ورځ، د سلواغې پر ۳مه، د فیضاحمد افضلي په نوم یو ځوان د هرات-کرخ پر لار ووژل شو.
د چارشنبې په ورځ، د سلواغې پر لومړۍ نېټه، د نقیبالله په نوم د یوه ځوان صراف مړی د هرات ښار په جبریل سیمه کې وموندل شو. افغانستان انټرنشنل ته د امنیتي کمرو رسېدلې ویډیوګانې ښيي چې موټرسایکلسپرو کسانو هغه د امام شش نور کلي پر لور لېږداوه. نوموړي هڅه وکړه چې له موټرسایکل څخه ځان وغورځوي او وتښتي، خو وسلهوالو هغه په دریو مرمیو وویشت او و یې واژه.
د شنبې په ورځ، د سلواغې پر ۴مه، د هرات ښار په «لیلامیو» سړک کې د یوه ځوان لاسپلورونکي ځړول شوی مړی وموندل شو، چې دغې پېښې د خلکو ترمنځ پراخې اندېښنې راوپارولې دي.
پر همدې ورځ، یو بل کس د هرات ښار په یوولسمه ناحیه کې ووژل شو. طالبانو اعلان وکړ چې وژل شوی کس «وسلهوال غل» و او خلکو وژلی دی.
سربېره پر دې، د یکشنبې مازیګر، د سلواغې پر ۵مه، د مستري اسماعیل په نامه یو تن د هرات ښار په مرکز کې د «سابقه فرقې» په نوم سړک کې ووژل شو. دوو سرچینو افغانستان انټرنشنل ته وویل، چې نوموړي د طالبانو استخباراتو ته کار کاوه، خو طالبانو تر اوسه په دې اړه څه نه دي ویلي.
د هرات ښار اوسېدونکي وايي، د دغو پرلهپسې پېښو له امله هرات «لا ناامنه» شوی او د امنیتي وضعیت په اړه یې اندېښنې زیاتې شوې دي.
د کندز ښار ځینو اوسیدونکو نن دوشنبه، د سلواغې ۶مه وویل، چې د طالبانو د کندز ښاروالۍ ټولو ښاریانو ته د ۱۴۰۴ کال د صفايي په نامه بېلونه لېږلي دي خو ښاروالۍ د صفايي چارې پر غاړه نه لري او هره میاشت یو خصوصي شرکت ته د صفايي لپاره ۱۰۰ افغانۍ ورکوي.
د کندز ښار یوه اوسیدونکي وویل:« کندز ښاروالۍ هر کور ته د ښاري او صفايې په نامه له ۲۰ زرو افغانیو څخه نیولې تر ۳۰ افغانیو پورې بېلونه رالېږلي او څوک چې یې نه ورکوي د هغوي کورونه مهر او لاک کوي.»
د ښار یو بل اوسیدونکی، چې د کور مساحت یې کم او کورنۍ کوچنۍ ده، وویل چې په ۱۴۰۴ کال کې یې ۱۱ زره ۸۰۴ افغانۍ بېل ورلېږلی. نوموړی وايي، اقتصادي وضعیت سم نه دی او ددې پیسو د ورکولو توان نه لري.
د ښار یو بل اوسیدونکي وویل:« چاته ورشو او چاته شکایت وکړو، هېڅوک مو خبرې نه اوري ښاروالي پاک کاري نه کوي، خو راځي په زور پیسې غواړي.»
د ښار اوسیدونکو د هغو کورونو انځورونه هم راولېږل، چې د طالبانو د کندز د ښاروالۍ له لوري مهر او لاک شوي، چې ولې د صفايي په نامه لېږل شوي بېلونه یې نه دي تحویل کړي.
دوی همدراز وايي، چې طالبانو ځینو کورونو ته د تېرو کالونو د صفايي بقایا هم لېږلې ده.
تر اوسه طالبانو په دې اړه څه نه دي ویلي.