طالبانو په غور او بدخشان ولایتونو کې درې تنه په دُرو وهلي دي
طالبانو د غور په دولتیار او د بدخشان په درواز ولسوالیو کې درې کسان د غلا، له کور څخه د تېښتې او تښتولو په تور په عام محضر کې په دُرو ووهل.
د طالبانو سترې محکمې د سېشنبې په ورځ (د سلواغې ۷مه) په یوه خبرپاڼه کې ویلي، چې له یادو کسانو څخه دوه تنه پر شپږـ شپږ میاشتو تنفیذي بند او ۳۶ـ ۳۶ دُرو او یو بل یې یوازې پر ۳۹ دُرو محکوم شوی و.
دا په داسې حال کې ده، چې طالبانو تېره ورځ هم په خوست کې ۳۶ کسان د «نشهيي توکو، نامشروع اړيکو او لواطت» په تور په دُرو وهلي دي.
د یادونې وړ ده، چې طالبانو په ۲۰۲۵ کال کې لږ تر لږه ۱۰۳۰ کسان د بېلابېلو تورونو په تور په عام محضر کې په دُرو وهلي دي. د افغانستان انټرنشنل - پښتو د څېړنو لهمخې؛ په ۲۰۲۵ کال کې په افغانستان کې بدني سزاوې د تېر کال پرتله دوه برابره زیاتې شوې وې.
که څه هم د طالبانو دا کړنه د بشري حقونو د سازمانونو له سخت مخالفت سره مخ شوې، خو طالبان بیا ټینګار کوي چې پر تورنو کسانو شرعي حدود پلي کوي.
