په بلوچستان او پښتونخوا کې په ټرافیکي پېښو کې ۹ کسان مړه او ۱۳ نور ټپيان شوي
د بلوچستان په چاغي او د پښتونخوا په صوابۍ کې په دوو جلا جلا ټرافیکي پېښو کې ۹ کسان مړه شوي او ۱۳ نور ټپیان شوي دي.
د بلوچستان په چاغي او د پښتونخوا په صوابۍ کې په دوو جلا جلا ټرافیکي پېښو کې ۹ کسان مړه شوي او ۱۳ نور ټپیان شوي دي.
د بلوچستان سیمه ییزو چارواکو ویلي، چې د بلوچستان ایالت د چاغي ولسوالۍ په یک مچ سیمه کې د دوو موټرو د ټکر له امله ۷ کسان مړه شوي او ۳ نور ټپیان شوي دي.
همدارنګه د پښتونخوا د صوابۍ ولسوالۍ ځايي چارواکو ویلي، چې د صوابۍ پر عمومي سړک د پنځو موټرو د ټکر په پېښه کې ۲ کسان مړه او ۱۰ نور ټپیان شوي دي.
د بلوچستان او پښتونخوا ایالتونو چارواکو د یادو ټرافیکو پېښو د لامل په اړه څه نهدي، خو تر ډېره د دغه ډول پېښو لامل د موټر چلوونکي بېاحتیاطي ګڼل کېږي.
د پاکستان د اطلاعاتو فدرالي وزیر عطاالله تارړ ویلي، د خیبر پښتونخوا له تیراه درې څخه د خلکو اېستنه له پوځ سره هېڅ تړاو نهلري او په دې اړوند خپرېدونکي خبرونه درواغ دي، خو ځايي اوسېدونکي وايي، له خپلو مېنو په زوره اېستل شوي دي.
عطاالله تارړ وویل، د سیمې د خالي کولو په تړاو ناسم خبرونه خپاره شوي او دا بهیر له پوځ سره تړل مناسب کار نهدی.
د پاکستان د اطلاعاتو وزیر په خبره، هغو کسانو ته چې په خپله خوښه له سیمې کډه کوي، د څلور اربه روپیو مرسته ځانګړې شوې ده. د نوموړي په وینا، تیراه دره کې د استخباراتي معلوماتو پر بنسټ عملیات روان دي، خو د خیبرپښتونخوا ایالتي حکومت ته پهکار ده، چې د دغه ایالت د ولس پر ښه ژوند، سوکالۍ او اسانتیاوو تمرکز وکړي.
دې پاکستاني چارواکي تر دې مخکې هم دغه ډول څرګندونې کړې وې، چې د خیبر پښتونخوا د اعلی وزیر سهیل اپریدي غوسه یې راپارولې وه.
اپریدي د سوات په مېنګوره کې یوه لاریون ته د وینا پر مهال خبرداری ورکړی وو، که پاکستانی پوځ په راتلونکو دوو یا هم درېیو ورځو کې عملیات ونه دروي، نو خیبر کې به لویه ولسي جرګه راوبولي. هغه زیاته کړې وه، چې دا جرګه به بیا د تیراه درې د عملیاتو په تړاو نوې پرېکړې وکړي او هم به ستراتېژي چمتو کړي.
د سهیل اپریدي په خبره، تیراه درې کې د هر ډول بد وضعیت د رامنځته کېدو مسوول د پاکستان په پوځ کې ځینې جنرال دي چې د تړلو دروازو تر شا ناسمې پرېکړې کوي.
له دې سره سم، د تیراه درې اوسېدونکي بیا وايي، د عملیاتو په پلمه له خپلو مېنو اېستل شوي او دمګړۍ په ډېر سخت وضعیت کې شپې او ورځې تېروي.
د پاکستان حکومت اپوزېسیون او د سیاسي ګوندونو ګډ خوځښت اعلان کړی، چې د راتلونکې فبرورۍ میاشتې پر ۸مه به دې هېواد کې ټول کاروبارونه بند وي. د شهباز شریف حکومت پر وړاندې د اپوزېسیون مشر محمود خان اڅکزی وایي، پر دې ورځ به ټول پاکستان بند وي او هر ډول چارې به په ټپه ولاړې وي.
د پښتونخوا ملي عوامي ګوند مشر وایي، دا پرېکړه د سیاسي ګوندونو ګډ خوځښت له دې امله کړې، څو په تېرو ټاکنو کې د عمران خان په مشرۍ له تحریک انصاف ګوند سره شوی «ظلم» وغندي. هغه زیاتوي، چې د عمران خان ګوند تېرې ټاکنې ګټلې وې، خو پایلې برعکس شوې او جمهوري حقونه تر پښو لاندې شول.
هغه د پاکستان له ټولو اوسېدونکو غوښتنه کړې، چې په دې سراسري لاریون کې ورسره په سولهییزه توګه ونډه واخلي او په پوره جرأت دې خپل دوکانونه هم بند کړي. اڅکزی زیاتوي: «د پاکستان هر هغه اوسېدونکی چې له دې هېواد سره مینه لري، جمهوریت یې خوښېږي او غواړي چې هېواد یې د انصاف لرونکی وي؛ نو باید خپل دوکانونه وتړي او سولهییزو احتجاجونو کې برخه واخلي».
نوموړي ویلي، د پاکستان له پوځ او څارګرو ادارو سره هېڅ ډول ستونزه نهلري او نه هم ورسره کومه دښمني لري. محمود خان اڅکزی وایي: «ټولې ادارې باید په خپل چوکاټ کې واوسي، هر هغه څه چې د پاکستان قانون وایي، باید ځانونه یې تابع کړي».
دا څرګندونې داسې مهال کېږي، چې پاکستان کې سیاسي او امنیتي وضعیت ورځ تر بلې ترینګلی کېږي. ګڼو سیاسي خوځښتونو پر اسلام اباد واکمن ملکي حکومت خلاف سره لاسونه یو کړي او تېره اوونۍ یې محمود خان اڅکزی د اپوزېسیون د مشر په توګه هم وټاکه.
د عمران خان ګوند او د سیاسي ګوندونو خوځښت وايي، د شهباز شریف حکومت په درغلیو واک ته رسېدلی او د پاکستان پوځ په دې کار کې لوی لاس لري. پخواني لومړي وزیر عمران خان څو ځله نیوکه کړې، چې د پاکستان پوځ سیاسي شوی او په نا اعلان شوې توګه دغه هېواد د نظامیانو له لوري اداره کېږي.
په کندهار کې د طالبانو تر واک لاندې د کډوالو چارو اداره وايي، چې د روان زېږدیز کال له پیله تر دې مهاله د پاکستان له زندانونو خوشې شوي ۱۸۵۳ افغان بندیان افغانستان ته ستانه شوي دي. د یادې ادارې په وینا؛ په همدې موده کې ۸۶۲۵ کډوال د سپين بولدک له لارې افغانستان ته ستانه شوي دي.
په کندهار کې د طالبانو تر واک لاندې د کډوالو چارو ادارې مرستیال نعمت الله الفت ویلي، چې د روان زېږدیز کال له پيل راهیسې تر دامهاله ۱۸۰۰ بندیان او ۱۷۲۵ کډوالې کورنۍ چې د غړو شمېر یې ۸۶۲۵ ته رسېږي؛ له پاکستان نه د سپين بولدک له لارې افغانستان ته ستانه شوي دي.
نوموړي ویلي، چې د یوې ورځې په لړ کې د کراچۍ له زندانونو تازه ۳۰۰ خوشې شوي بندیان له همدې لارې دوی ته سپارل شوي دي. یادې ادارې زیاته کړې، چې د ستانه شویو کډوالو سره یې په بېلابېلو برخو کې مرستې کړې دي.
افغانستان ته تازه ستانه شوي کډوال په پاکستان کې د پولیسو له ظلم، وهلو، زنداني کولو او له دوی څخه د پیسو اخیستلو اړوند شکایتونه کوي. تېره اونۍ یوشمېر ستانه شویو افغان کډوالو افغانستان انټرنشنل - پښتو ته ویلي و، چې د کورنۍ ځینې غړي یې د پاکستاني پولیسو له لوري نیول شوي او لاتراوسه لادرکه دي.
دغه کورنیو ویلي و، له یوې خوا یې په پاکستان کې شتمنۍ، کارونه او له کلونو راهیسې تېر کړی ژوند شاته پرېښی او له بلې خوا یې د کورنۍ غړي هلته په زندانونو کې پاتې دي. ملګرو ملتونو په خپل وروستي راپور کې ویلي، چې یوازې د ۲۰۲۵کال په جنورۍ میاشت کې له پاکستان نه ۱۸زره او ۳۰۰ افغانان پولیسو نیولي او په زور یې افغانستان ته ستانه کړي دي.
د ملګرو ملتونو راپور کاږي، چې پاکستان د ۲۰۲۳کال له سپټمبر راهیسې له دغه هېواده تر ۸۲۵زره او ۶۰۰ ډېر افغان وګړي افغانستان ته ستانه کړي دي. د ملګرو ملتونو د کډوالو عالي کمېشنرۍ له پاکستاني چارواکو غوښتي، چې د افغان کډوالو خپلسرې نیونې او جبري اېستل دې ودروي.
په پاکستان کې ډېری دغه افغانان درېیمو هېوادونو ته د تګ تکل لري او د ویزو ترلاسه کولو په تمه دي.
د خیبرپښتونخوا د بنو ولسوالۍ په دومېل سیمه کې د افغان کډوالو پنډغالي ته نږدې ناپېژاندو وسلهوالو د امن کمېټې غړی خواجت الله په ډزو وژلی او د هغه د ترهزوی یې سخت ټپي کړی دی. ځایي پولیس وایي، د پېښې په اړه یې پلټنې پیل کړې دي.
د بنو پولیسو ویلي، دغه پېښه د دومېل سیمه کې د افغان کډوالو پنډغالي ته نږدې هغه مهال شوې چې خواجتالله او نسیمالله په یوې هټۍ کې د توکو په پېرلو بوخت وو. په پېښه کې ټپي شوي نسیمالله پولیسو ته په خبرو کې ویلي، له هېچا سره یې شخصي دښمني یا شخړه نهلرله.
د بنو ولسوالۍ د پولیسو مشر یاسر اپریدي ویلي: «پلټنې روانې دي او د پېښې د انګېزې معلومولو لپاره ټول ممکن اړخونه څېړل کېږي». د دغه برید پړه لاتراوسه کومې وسلهوالې ډلې په غاړه نهده اخیستې.
دا په داسې حال کې ده، چې د جمعې په شپه هم د خېبرپښتونخوا په دېره اسماعېل خان کې د امن کمېټې د مشر نور عالم محسود په کور کې د واده پر مراسمو ځانمرګي برید کې د نور عالم محسود په ګډون ۱۰ کسان وژل شوي او ګڼ نور ټپيان شوي وو.
پاکستاني پولیسو د پنجاب په جهلم ښار کې د بېاسناده افغان کډوالو پر وړاندې خپل عملیات چټک کړي دي. د راپورونو له مخې؛ پولیسو د شنبې په ورځ درې افغان کډوال نیولي او یو پاکستانی وګړی یې هغوی ته د پناه ورکولو په تور نیولی دی.
د پاکستان نېشن ورځپاڼې د یکشنبې په ورځ (د سلواغې ۵مه) راپور ورکړی، چې پاکستاني پولیسو د افغان کډوالو پر وړاندې خپل عملیات پراخ کړي دي او د حکومت لهخوا ټاکل شویو پنډغالو ته د هغوی د لېږد لړۍ لاهم روانه ده.
د جهلم ښار پولیسو خپلو وګړو ته خبرداری ورکړی، چې کورونه، هټۍ یا موټرونه هغه کډوالو ته چې د اوسېدو قانوني اسناد نهلري په کرایه ورنهکړي. پولیسو ټینګار کړی، بېاسناده کډوالو ته اجازه نه ورکول کېږي چې په پاکستان کې کاروبار وکړي، څه وپېري یا وپلوري.
د جهلم د پولیسو مشر طارق عزیز سندهو وویل، د پنجاب حکومت امرونه د بېاسناده کډوالو پر وړاندې پلي کېږي او د هر هغه چا پر وړاندې به قانوني اقدام وشي چې له دغه امرونو سرغړونه کوي.
پاکستاني پولیسو د نومبر په میاشت کې د پنجاب په جهلم ښار کې د افغان کډوالو د نیولو لپاره عملیات پیل کړي وو. د دغه هېواد چارواکو مخکې په یاد ښار کې د سلګونه افغان کډوالو د نیولو راپور ورکړی و.
په وروستیو میاشتو کې د طالبانو او پاکستان ترمنځ د اړیکو له ترېنګلتیا وروسته اسلاماباد د افغان کډوالو د اېستلو لړۍ ګړندۍ کړې او زرګونه کسان یې له هېواده اېستلي دي.
دغه بهير د بشري حقونو د سازمانونو اندېښنې هم راپارولې دي. د ملګرو ملتونو کارپوهانو هم د کډوالو د جبري اېستلو زیانمنو پایلو په اړه خبرداری ورکړی او له اسلاماباد يې غوښتنه کړې، چې نړۍوالو ژمنو ته وفاداره پاتې شي.
د ملګرو ملتونو د راپورونو له مخې؛ په ۲۰۲۵کال کې له ايران او پاکستان نه تر دوه مېليونه ډېر کډوال افغانستان ته ستانه شوي، چې ګڼ یې په جبري توګه ستانه کړای شوي دي.
