امریکا په منځني ختیځ کې پوځي تمرینات کوي؛ نتنیاهو وايي چې تهران ته ځواب ورکولو ته چمتو دی
په داسې حال کې چې د امریکا هوايي ځواک اعلان کړی، چې ایران ته نږدې به پوځي تمرینات وکړي او د اسلامي جمهوریت پر وړاندې د احتمالي برید په اړه اټکلونه دوام لري، نتنیاهو خبرداری ورکړ، چې که ایران پر اسراییل برید وکړي نو له سخت ځواب سره به مخ شي.
هغه د سېشنبې په ورځ د سلواغې په اوومه وویل، چې اسراییل بدلونونه په دقت سره څاري او د ټرمپ له پرېکړې پرته، هر ډول سناریو ته چمتو دی.
په همدې تړاو، متحده ایالاتو هم اعلان وکړ چې له ایران سره د روانو کړکېچونو په ترڅ کې په منځني ختیځ کې هوايي پوځي تمرینات ترسره کوي.
د امریکا د نهم هوايي ځواک قوماندانۍ (افسنټ) اعلان وکړ، چې دا تمرینات «د امریکا د مرکزي قوماندانۍ (سنتکام) د مسوولیت په ټوله سیمه کې د جنګي هوايي ځواک د ځای پر ځای کولو، خپرولو او ساتلو د وړتیا ښودلو» لپاره ترسره کوي.
د دې تمریناتو خبر یوه ورځ وروسته له هغه اعلان شو چې سنتکام وویل، د ابراهام لینکن په نوم د الوتکو وړونکې بېړۍ او ورسره مل جنګي کښتۍ د منځني ختیځ اوبو ته رسېدلي دي.
