د ملګرو ملتونو د سرمنشي ویاند د طالبانو د جزايي اصولنامې په غبرګون وویل، چې دا سازمان په افغانستان کې له واکمنې ډلې غواړي چې تبعیضي قوانین او فرمانونه لغوه کړي. سټیفن دوجاریک د سېشنبې په ورځ افغانستان انټرنشنل ته وویل، چې طالبان باید نړۍوالو قوانینو ته ژمن پاتې شي.
هغه زیاته کړه، چې د طالبانو فرمانونه او قوانین «د افغانستان د خلکو په ځانګړې توګه د ښځو او نجونو انساني حقونه نقضوي».
دوجاریک همداراز وویل، چې د ملګرو ملتونو د سرمنشي مرستیالې کابل ته په خپل وروستي سفر کې د طالبانو له چارواکو غوښتي، چې د ښځو ضد قوانین لغوه کړي.
هغه څرګنده کړه، چې د مېرمن ډیکارلو د سفر موخه دا وه چې د طالبانو اداره د "هڅونې او فشار" له لارې اړ کړي، ترڅو د خلکو په ځانګړې توګه د ښځو مساوي حقونه او انساني کرامت رعایت کړي.
دا په داسې حال کې ده، چې رزماري ډيکارلو تېره اوونۍ کابل ته په یوه درې ورځني سفر کې د طالبانو د بهرنیو او کورنیو چارو له وزیرانو او همدارنګه له یو شمېر ښځو او د رسنیو له استازو سره وکتل او خبرې یې ورسره وکړې.
دا د طالبانو له واکمنیدو وروسته کابل ته د رزماري ډيکارلو څلورم سفر دی. نوموړې په دغه سفر کې د دوحې د بهیر په اړه خبرې وکړې او د ملګرو ملتونو پر ښځینه کارکوونکو د لګول شویو محدودیتونو د لغو کېدو غوښتنه یې هم وکړه.
