په هرات کې د طالبانو د کار او ټولنیزو چارو ریاست خبر ورکړی، چې په تېره یوه میاشت کې له ایران نه ۲۱۵ اېستل شوي ماشومان یې له خپلو کورنیو سره یو ځای کړي دي. طالبانو زیاته کړې، چې له دغه ماشومانو سره یې مرستې کړې او بېسرپرسته ماشومان یې مرستندویه ادارو ته ورپېژندلي دي.
په هرات کې د طالبانو د کار او ټولنیزو چارو رییس حافظ ابومحمد منصور د سېشنبې په ورځ (د سلواغې ۷مه) ویلي، چې یاد ماشومان یې تر ستنېدو وروسته ثبت کړي او لومړني خدمتونه یې ورته برابر کړي.
نوموړي زیاته کړې: «۴۳ ناروغ، یتیم او زیانمن ماشومان یې خصوصي روغتیايي مرکزونو ته د درملنې او ۱۳ نور بېسرپرسته ماشومان یې خیریه بنسټونو ته معرفي کړي او طبي خدمات ورته رسېدلي دي». د نوموړي په خبره؛ په تېره میاشت کې له ایران نه د خواجه عبدالله انصاري پولې له لارې ۹۴ اېستل شوي ماشومان یې هم خپلو کورنیو ته سپارلي دي.
