په کندوز کې د طالبانو امنیې قوماندانۍ خبر ورکړی، چې په دغه ولایت کې یې د غلا په تور ۹ کسان نیولي دي. د دوی په وینا؛ دغه کسان په تېره یوه اوونۍ کې د ګل تپې ولسوالۍ په شاوخوا سیمو کې د بېلابېلو عملیاتو پرمهال نیول شوي دي.
یادې قوماندانۍ د یوې خبرپاڼې په خپرولو سره ویلي، له دغه کسانو یوه اندازه د کور وسایل او نغدې پیسې هم ترلاسه شوې دي. د خبرپاڼې لهمخې؛ دغه کسان د ګل تپې ولسوالۍ اوسېدونکي دي او د لومړنیو پوښتنو او ګروېږنو له بشپړېدو وروسته به عدلي او قضايي بنسټونو ته وسپارل شي.
د برېتانیا د امنیت پخواني وزیر ټام توګندهات د طالبانو د لوړو زدهکړو د وزیر له هغه څرګندونو وروسته سخت غبرګون ښودلی، چې پهکې د ښځو پر زدهکړو د بندیز خبره شوې ده. نوموړي ویلي، پر افغانستان یوه «وېرونکې بلا» واکمنه ده.
هغه له بنسټیزو انساني حقونو څخه د افغان ښځو او نجونو محرومول په سختو ټکو وغندل.
ښاغلي توګندهات د دوشنبې په ورځ (د سلواغې ۶مه) پر خپلې اېکسپاڼه لیکلي، طالبان له اساسي حقونو د ښځو او نجونو محرومول د یوې «کرکجنې اسلامپالې ایډیالوژۍ» په نوم توجیه کوي.
توګندهات چې پخوا د برېتانیا د امنیت وزیر پاتې شوی، دا مهال د دغه هېواد د پارلمان د بهرنیو اړیکو د کمېټې مشري پر غاړه لري، د طالبانو د لوړو زدهکړو د وزیر ندا محمد ندیم یوه ویډیو هم پر خپله پاڼه خپره کړې ده. په دې ویډیو کې، چې د ۱۴۰۳ لمریز کال د وږي په میاشت کې خپره شوې، ندیم د نجونو د زدهکړو او تعلیم پوښتنه تر «امرثاني» پورې منع اعلان کړې ده.
طالب چارواکو په تېرو څلورو کلونو کې بیا بیا ویلي، چې د نجونو د ښوونځیو د بېرته پرانېستلو لپاره شرایط برابر نهدي، خو په عین حال کې ادعا کوي، چې په ټول هېواد کې بشپړ امنیت ټینګ شوی او د لویو بنسټیزو پروژو چارې روانې دي.
د طالبانو ویاند ذبیحالله مجاهد ویلي، د افغانستان د ټولنې ځینې برخې د نجونو له زدهکړو سره موافق نهدي. طالبان له هغه وخته چې د ۱۳۷۰یمو کلونو په پیل کې راڅرګند شول، د ښځو د کار او زدهکړې سخت مخالفین پاتې شوي دي.
ټام توګندهات پرته له دې چې د امریکا نوم واخلي، د طالبانو او امریکا ترمنځ شوی تړون د افغان ښځو د اوسني ناوړه وضعیت لامل وباله. دا د دوحې د سولې د تړون په اړه د یوه مخکښ برېتانوي سیاستوال له لوري نادره نیوکه بلل کېږي، ځکه برېتانیا د امریکا نږدې متحد هېواد دی.
هغه وویل، چې د سولې له تړون وروسته «افغانستان داسې برخلیک ته پرېښودل شو. دا سوله د چا لپاره وه؟ د افغانانو لپاره نه وه».
امریکایي چارواکي، سره له دې چې پوهېدل د اشرف غني حکومت د طالبانو پر وړاندې د مقاومت توان نهلري، خو بیا هم په ۱۴۰۰ لمریز کال کې له افغانستانه ووتل. د وتلو له وروستیو ورځو سره سم، پخوانی ولسمشر غني له افغانستانه ووت او د افغانستان پوځ هم ونړېد.
د مخکیني جمهوري نظام پر مهال د پکتیا پخواني والي محمد حلیم فدایي ویلي، د طالبانو مخالفان یوازې یوه لاره لري او هغه دا چې باید خپلمنځي اختلافات پای ته ورسوي. د هغه په وینا، د طالبانو مخالف سیاستوال باید یو منظم، واحد او د باور وړ اپوزېسیون رامنځته کړي.
نوموړي د سلواغې په ۶مه پر خپله اېکسپاڼه لیکلي: «که څوک دا ګومان کوي چې په اوسني ګډوډ، وېشلي، بې روایته او بېبرنامې حالت کې به د افغانستان وضعیت بدل کړي، نو دا نهیوازې ناممکنه ده، بلکې خپل شخصي او سیاسي حالت به هم بدل نه کړي».
د فدایي په خبره، نور باید د نړیوالو تشو وعدو، کیسو او پیسو ته سترګې ونه نیول شي. هغه دا حالت «جهالت» بللی دی.
په جلا وطنۍ کې د پخواني نسکور شوي جمهوري نظام یو شمېر چارواکو او د ګوندونو مشرانو په ترکیې او یو شمېر نورو هېوادونو کې د طالبانو خلاف ګډ سیاسي خوځښتونه رامنځته کړل، خو وروسته یې ترمنځ اختلافونه اوج ته ورسېدل او فعالیتونه یې بېرته په ټپه ودرېدل.
د طالبانو د سیاسي مخالفانو تر څنګ د دغې ډلې پر وړاندې یو شمېر وسلهوالې جبهې هم جوړې شوي او باور لري، چې دوی پر کابل له واکمنې ډلې څخه د افغانستان د ازادۍ لپاره «جنګي مبارزه» کوي. هممهاله د دغو جنګي جبهو ترمنځ هم اختلافات لیدل شوي او پر یوه لاره یې تګ ناشونی بلل شوی دی. ان وخت ناوخت د دغو جبهو لهمنځه پر یو بل توندې نیوکې هم شوې دي.
ملګرو ملتونو ویلي، تر هغې چې په افغانستان کې د ښځو پر وړاندې تبعیض او بندیزونه کم نهشي، د ښځو د وضعیت د ښهوالي اړوند خبرې د باور وړ نهدي. د ملګرو ملتونو ویاند د دوشنبې په ورځ وویل، د ښځو د ژوند شرایط هغه وخت د باور وړ بدلون موندلی شي، چې پر هغوی لګېدلي محدودیتونه لرې شي.
د ملګرو ملتونو د سرمنشي مرستیالې روزمري ډیکارلو کابل ته د د درې ورځني سفر پر مهال د طالبانو له چارواکو وغوښتل، څو پراخ تبعیضي اقدامات، لکه د ښځو پر کار او زدهکړو بندیزونه لغوه کړي.
د ملګرو ملتونو ویاند اسټېفان دوجاریک د دې پوښتنې په ځواب کې چې طالبانو د دې غوښتنې په اړه څه غبرګون ښودلی، د جزییاتو له ورکولو ډډه وکړه. دا چاره ښيي، چې د سرمنشي مرستیالې د ښځو د حقونو د درناوي په اړه له طالبانو کوم هیلهبښونکی پیغام نهدی ترلاسه کړی.
دوجاریک په نیویارک کې یوې خبري غونډې ته وویل: «زه نشم کولی د کابل د واکمنو چارواکو پر ځای خبرې وکړم، خو یوه خبره روښانه ده، چې افغان نجونې او ښځې د ژوند په ټولو برخو کې تر سختو بندیزونو لاندې دي، نو کله چې دا محدودیتونه کم شي، هغه وخت بیا ویلی شو چې بدلون راغلی دی».
د روزمري ډیکارلو سفر د یکشنبې په ورځ د سلواغې په پنځمه پای ته ورسېد. دا سفر د ښځو پر کار د بندیزونو د لرې کولو، د تبعیض د پای ته رسولو او د نړۍوالې ټولنې پر وړاندې د طالبانو د ژمنو پر ټینګار متمرکز وو.
خو برعکس، طالب چارواکو په خپلو اعلامیو کې، چې د ملګرو ملتونو د سرمنشي د مرستیالې له سفر وروسته خپرې شوې، د افغان ښځو پر وړاندې د ځپنې او تبعیض موضوع له پامه غورځولې او پر اقتصادي لاستهراوړنو او د نشهيي توکو پر ضد پر مبارزې ټینګار کړی دی.
د دواړو لورو اعلامیې ښيي، چې د نړۍ د هېوادونو په استازیتوب د ملګرو ملتونو او د طالبانو د ادارې اجنډاوې یو بل ته نږدې شوې نهدي او طالبان لا هم نهغواړي د ښځو د بنسټیزو حقونو په تړاو له ملګرو ملتونو سره رغنده خبرې وکړي.
ډیکارلو د دې سفر پر مهال په کابل کې د مدني ټولنې له استازو او بهرنیو ډېپلوماتانو سره ولیدل، خو د نامعلومو لاملونو له امله یې له مشهورو سیاسي څېرو لکه ډاکټر عبدالله عبدالله سره نهدي لیدلي.
د طالبانو د امربالمعروف او نهې عن المنکر وزارت وايي، دوه کسان یې په بلخ او غور ولایتونو کې د کوډګرۍ او د خلکو د غولولو په تور نیولي دي.
دغه وزارت د دوشنبې په ورځ (د سلواغې ۶مه) د یوې خبرپاڼې په خپرولو سره ویلي، دغو کسانو د غولوونکو چارو او د خلکو له دیني باورونو په ناسمه استفادې سره په غیر مشروع ډول له خلکو ډېرې پیسې اخیستې، خو بالاخره د ځايي خلکو له شکایتونو وروسته نیول شوي دي.
دغه وزارت ویلي، یاد کسان به ډېر ژر عدلي او قضايي بنسټونو ته وسپارل شي.
طالبانو یو ځل بیا خبرداری ورکړی، چې د اسلامي شریعت خلاف هر ډول چاره به په جدي توګه وڅارل شي او سرغړوونکي به د قانون منګلو ته وسپارل شي.
د افغانستان لپاره د پاکستان پخوانی ځانګړی استازی اصف درانی د ملا هبتالله «جزایي اصولنامې» ته په اشارې ویلي، دا خورا د اندېښنې وړ ده، چې ملایان له هر ډول محاکمې خوندي وي. هغه وایي، د ملا هبتالله اصولنامه کې اشرافو ته قانون نشته، خو د ټولنې عام وګړي پهکې «غلامان» ښودل شوي.
دې مخکېني پاکستاني چارواکي نیوکه کړې، چې د طالبانو دغه «جزایي اصولنامه» به افغان ټولنه د تیارو پر لور ور برابره کړي او عدالتي بهیر به لا نور ټکنی کړي. نوموړي همداراز اندېښنه څرګنده کړې، چې په دې اصولنامه کې کم عمره نجونې د واده وړ بلل شوې دي.
اصف درانی د دوشنبې په ورځ (د سلواغې ۶مه) په خپله اېکسپاڼه لیکلي، چې د کم عمره نجونو ودول د افغاني ټولنې یو پخوانی دود دی او باید مخه یې په دې قانون کې نیول شوی وی. هغه همدا راز ادعا کړې: «په دودیز ډول افغاني ټولنه کې چې کله نجلۍ په یوې کورنۍ کې زېږي، خلک ورته د پیسو د سرچینې په سترګه ګوري. ځکه د نجلۍ ورونه یا پلار د واده پر مهال پیسې چې ولور بلل کېږي، ترلاسه کوي».
د افغانستان لپاره د پاکستان دې پخواني استازي تر دې دمخه هم د طالبانو پر یو شمېر کړنو جدي نیوکې کړي او ان پر افغانستان یې دا واکمنه ډله استبدادي هم بللې ده. د طالبانو د «جزایي اصولنامې» په تړاو ګڼو افغان حقوق پوهانو او پخوانیو حکومتي چارواکو هم سختې نیوکې کړي او دا یې د افغانانو پر وړاندې د محدودیتونو او بندیزونو نوې هڅه بللې ده.
ملا هبت الله تېره اونۍ یاده اصولنامه توشېح کړې، چې لهمخې یې د ټولنې وګړي په بېلابېلو طبقو وېشل شوي او د طالبانو په ګډون په کې ملایانو ته د جرمونو پر وړاندې ځانګړی معافیت ورکړل شوی دی.
