د طالبانو د ارشاد، حج او اوقافو وزارت د ۱۴۰۵ ل کال د حج فریضې د ادا کولو لپاره د نوملیکنې د متقاضیانو ترمنځ د قرعه اچونې بهیر پیل کړ. د دغه وزارت د معلوماتو له مخې، شاوخوا ۹۸ زره، ۷۷۲ متقاضیانو نوم لیکنه کړې وه.
یاد وزارت زیاتوي چې دغه بهیر د اړوندو ادارو د استازو په حضور او د ځانګړو مراسمو په ترڅ کې د ټاکل شويو اصولو له مخې ترسره شو.
د وزارت مسلکي مرستیال مولوي محمد حامد حسیب، د بهیر د څرنګوالي او شفافیت په اړه وویل چې د نویو متقاضیانو د نوملیکنې پروسه د مرغومي میاشتې په ۲۴ نېټه په کابل او ټولو ولایتونو کې پیل او د د سلواغې میاشتې په ۴ نېټه پای ته ورسېده.
د کابل ښار د ناحیو په شمول په ټول هېواد کې اته نوي زره، اووه سوه او دوه اویا تنو نویو متقاضیانو د حج ادا کولو لپاره نوم لیکنه کړې او نن چارشنبه د هغوی ترمنځ د قرعه اچونې بهیر پیل شو.
حسیب زیاته کړه چې د قرعې اچونې له لارې منتخب شوي متقاضیان به د سږ کال د حج لپاره واستول شي.
