تر ۷۰ زرو ډېر کسان د پاکستان د پوځ د عملیاتو له ویرې له تیرا نه وتلي
د خیبر پښتونخوا د تیرا سیمې له۷۰ زرو ډېر وګړي، چې زیات یې مېرمنې او ماشومان دي، د ټي ټي پي خلاف د پاکستان د پوځ د عملیاتو له وېرې بېځایه شوي، خو اوس ددغه هېواد چارواکي وايي، چې خلک د واورو له امله وتلي او دوی د وتلو امر نه دی ورته کړی.
د پاکستان د بهرنیو چارو وزیر خواجه محمد ااصف د سیمې د خلکو او سیمهییزو چارواکو دا څرګندونې چې دوی اېستل شوي، رد کړې او ټینګار یې کړی چې د خیبر پښتونخوا په تیرا سیمه کې هیڅ ډول پوځي عملیات نه دي پلان شوي.
اصف په اسلاماباد کې د یوې خبري غونډې پر مهال وویل چې د خلکو د تښتېدلو علت پوځي اقدامات نه، بلکې سخت اقلیمي شرایط دي. دا څرګندونې څو اونۍ وروسته له هغې مطرح شوې چې خلک د تیرا سیمې څخه د احتمالي پوځي عملیاتو د ویرې له امله وتښتېدل.
د کډوالي څپه وروسته له هغې پیل شوه چې شاوخوا یو میاشت وړاندې، د جوماتونو له ممبرونو خلکو ته ویل شوي وو چې د جنورۍ تر ۲۳مه نېټې د تیرا سیمه پرېږدي څو له احتمالي جګړې په امان کې وي.
د خیبر پښتونخوا د ایالتي حکومت ویاند شفیع جان پر اېکسپاڼه لیکلي چې فدرالي حکومت د بې ځایه شویو خلکو د کړاو مسوول دی او اشاره یې کړې چې د اسلاماباد چارواکي د پوځي عملیاتو په اړه له خپل مخکیني دریځ څخه شاتګ کړی دی.
