د امریکا د بهرنیو چارو وزارت فارسي پاڼې لیکلي، د ایران حکومت د اقتصاد په ویجاړولو سره د ایران خلک د لومړنیو اړتیاوو په پوره کولو کې پاتې راوستي او دا وضعیت د اعتراضونو یو له اصلي لاملونو څخه دی.
دغې ادارې زیاته کړې، چې اوس ماتم ځپلې کورنۍ د خپلو عزیزانو د مړیو د تسلیمولو لپاره د پیسو ورکولو یا پور اخیستلو ته اړ اېستل کېږي.
د دغې ادارې په وینا، د ایران حکومت همدا ډول پر کورنیو فشار راوړي ترڅو داسې درواغجن اعترافونه لاسلیک کړي، چې ګواکې وژل شويو کسانو له حکومت څخه ملاتړ کاوه او ګواښ کوي، چې که دا کار ونه کړي، مړي به یې ورته ونه سپاري او یا به یې وسوځوي.
په دغه بیان کې ټینګار شوی، چې د ایراني کورنیو له غم او ویر څخه د اسلامي جمهوري نظام ګټه اخیستنه «کرکجن او غېرانساني» عمل دی.
د امریکا د بهرنیو چارو وزارت اعلان وکړ، چې له خپلو وګړو سره د حکومت چلند وروستۍ درجه بېرحمي ښيي او د خپلو عزیزانو د مړیو د بېرته ترلاسه کولو لپاره پر کورنیو د ناممکنه غوښتنو منل د «بېبریده وحشيتوب» یوه بېلګه ده.
