د اندونیزیا په لوېدیځ باندونګ سیمه کې د ځمکې ښویېدو له امله لږترلږه ۳۴ کسان مړه او ۳۲ نور تري تم دي. ځایي چارواکي وایي، د لادرکه شویو کسانو د پلټنې عملیات د باران له امله له خنډ سره مخ شوي دي.
یاده سیمه د اندونیزیا د پلازمینې جاکارتا څخه شاوخوا ۱۰۰ کیلومتره لرې پرته ده.
د روسیې د ولسمشر ویاند دیمیتري پېسکوف تایید کړه، چې د کرملین کارمندان په پراخه کچه مصنوعي ځیرکتیا کاروي. نوموړي وویل چې ددوی کارکوونکي د روسیې اړوند مصنوعي ځیرکتیا کاروي.
پېسکوف د سلواغې پر ۷مه د روسیې رسنیو ته وویل:« د مصنوعي ځیرکتیا ټیکنالوژي لا دمخه د کرملین لپاره یو معیاري وسیله ګرځیدلې او د کارمندانو له خوا په پراخه کچه کارول کیږي.»
د دې پوښتنې په ځواب کې چې ایا د کرملین کارمندان په خپل کار کې مصنوعي ځیرکتیا کاروي، پېسکوف وویل: «البته موږ یې کاروو. اوس دا د کار لپاره یو معیاري وسیله ده.»
هغه د روسیې مصنوعي ځیرکتیا پیاوړې او خوندي وبلله.
د ۱۴۰۳ کال په مروغومي میاشت کې ولادیمیر پوتین د روسیې حکومت ته امر وکړ، چې د مصنوعي ځیرکتیا په برخه کې له چین سره همکاري پراخه کړي.
د اسراییل پوځ د دوشنبې په ورځ اعلان وکړ، چې تر ۸۴۳ ورځې جګړې وروسته ټول اسراییلي یرغملي او د هغوی جسدونه د غزې له تړانګې اسراییل ته لېږدول شوي دي. د اسراییل پوځ لهخوا په خپرې شوې ویډیو کې ښکاري، چې په غزه کې د وروستي یرغملي جسد ترلاسه شوی او اسراییل ته لېږدول شوی دی.
د اسراییل پوځ زیاته کړې، چې د دغه جسد په موندلو سره، «له غزې تړانګې څخه د ټولو یرغملو د بېرته ستنولو لړۍ بشپړه شوې ده». د جسدونو تبادله د امریکا په منځګړیتوب د اوربند د یوې برخې په توګه وشوه، چې د ۲۰۲۵کال (د اکتوبر په ۱۰مه) پیل شوه.
په ورته وخت کې د فلسطین دولتي رسنیو راپور ورکړی، چې د اسراییل پوځ په غزه کې لسګونه جوړښتونه ویجاړ کړي، د سیمې په ختیځ کې د «ژېړ زون» په نوم یې پېژندل شوی امنیتي زون پراخ کړی او د خپلو ځواکونو لپاره یې لږترلږه شپږ نوي ځایونه جوړ کړي دي. دغه اقدام د غزې په ځینو برخو کې د اسراییل د پوځي حضور د پیاوړتیا په اړه اندېښنې راپورته کړې دي.
په ورته وخت کې د امریکا ولسمشر ډونالډ ټرمپ د «سولې بورډ» د پرانیستې په مراسمو کې اعلان وکړ، چې امریکا به د ملګرو ملتونو په ګډون د بېلابېلو لوبغاړو سره همکارۍ ته دوام ورکړي.
د برېتانیا ګارډین ورځپاڼې د دوشنبې په ورځ (د سلواغې ۶مه) په یوه راپور کې د څارونکو په حواله لیکلي، چې ایران ته نږدې د «یو.اېس.اېس» ابراهام لېنکلن الوتکه وړونکې بېړۍ تر لېږد وروسته امریکا او اسراییل د یوه نوي برید لپاره چمتوالی نیسي.
د دغه رسنۍ د راپور له مخې؛ داسي ګڼل کېږي چې واشنګټن د اسراییل جنګي الوتکو سره په همغږۍ د خپلو بریدونو د ترسره کولو لپاره اړین اور وژونکی ځواک لري، چې موخه یې د هغه حکومت نسکورول دي چې د لاریونونو پرمهال د زرګونه ایرانیانو په وژنه تورن دی.
ګارډین لیکي، چې احتمالي برید به د ایران له مخکې زیانمن شوي اټومي پروګرام د کمزوري کولو لپاره نه؛ بلکې د ایران د سیاسي مشرتابه د هدف ګرځولو او سړکونو ته د هغو معترضو د راوېستو لپاره وي، چې د خپل ژوند د خرابېدو له امله په غوسه دي.
په ورته وخت کې اېکونومېسټ مجلې په یوه راپور کې د ایران شاوخوا د امریکا د پوځي چمتوالي په اړه د خلیجي چارواکو په حواله لیکلي، چې د امریکا د پراخ برید احتمال ډېر دی او ښايي د ایران سیاسي مشرتابه په نښه کړي.
د امریکا د بهرنیو چارو وزارت یو ویاند ایران انټرنشنل ته ویلي، د ټرمپ حکومت غواړي چې «په نړۍ کې د ترهګرۍ ترټولو لوی دولتي ملاتړی» ایران خپل اټومي فعالیتونه، د بالستیک توغندیو پروګرام او په سیمه کې د خپلو نیابتي ډلو ملاتړ ودروي.
نوموړي ویلي: «د ایران حکومت په تېرو څو لسیزو کې په قصدي ډول د دغه هېواد اقتصاد، کرنه، اوبه او برېښنا له پامه غورځولي او پر ځای یې د ایران د خلکو سترې شتمنۍ او راتلونکی د ترهګریزو نیابتي ډلو او د اټومي وسلو د څېړنو لپاره لګولې دي».
دغه څرګندونې د ایران دولتي رسنیو د یوه راپور په اړه د یوې پوښتنې په ځواب کې شوې دي. په هغه کې راپور کې ادعا شوې وه، چې د امریکا ولسمشر ډونالډ ټرمپ د تهران سره د جوړجاړي لپاره د «اسراییل په رسمیت پېژندلو» شرط زیات شوی دی.
ټرمپ مخکې «اکسیوس» وېبپاڼې ته ویلي و، د ایران وضعیت «په بدلېدو دی»، په ځانګړې توګه وروسته له هغه چې دوی سیمې ته یو «ستر سمندري ځواک» ولېږه؛ خو په ورته وخت کې باوري و، چې تهران د یوې هوکړې لپاره لېواله دی. هغه زیاته کړه: «هغوی غواړي هوکړې ته ورسېږي. زه په دې پوهېږم. څو، څو ځله یې اړیکه نیولې. غواړي خبرې وکړي».
د فلسطین روغتیا وزارت خبر ورکړی، چې د اکټوبر له لسمې نېټې د اوربند له پیل راهیسې تر اوسه پر غزې د اسراییل په بریدونو کې لږترلږه ۴۸۶ فلسطینیان وژل شوي او ۱۳۴۱ نور بیا ټپیان شوي دي. د راپور له مخې؛ یوازې د اکټوبر په ۱۹مې او ۲۹مې نېټې بریدونو کې ټولټال ۱۵۴ کسان وژل شوي دي.
د اسراییل او حماس ترمنځ د اوربند تړون د امریکا د ولسمشر ډونالډ ټرمپ د وړاندیز شوې طرحې پر بنسټ ټینګ شو. د یادې طرحې په لومړي پړاو کې یوشمېر اسراییلي او فلسطیني بندیان هم خوشې شوي وو.
الجزیرې ټلوېزیوني شبکې راپور ورکړی، چې د جګړې له پیل راهیسې تراوسه پورې پر غزې د اسراییل په بریدونو کې ۷۱زره او ۶۶۰ فلسطینیان وژل شوي دي. په راپور کې راغلي، چې د اسراییل په هوایي او ځمکنیو بریدونو کې بیا د فلسطین ۱۷۱زره او ۴۱۹ وګړي ټپیان شوي هم دي.
په دې مرګ ژوبله کې ډېری یې ښځې او ماشومان دي.