د ترکیې د بهرنیو چارو وزیر: امریکا باید له ایران سره اختلافات «یو په یو» حل کړي
د ترکیې د بهرنیو چارو وزیر هاکان فیډان د الجزیرې ټلویزیون سره په مرکه کې پر ایران د امریکا د احتمالي برید په اړه وویل، چې دا «ناسم» کار دی. هغه غوښتنه وکړه، چې اختلافونه دې په «دیپلوماتیکه او تدریجي» بڼه حل شي.
هغه زیاته کړه، لاهم د روانو کړکېچونو لپاره «دیپلوماتیک حل لاره» شته او ایران چمتو دی چې د اټومي مسلې په اړه بیا خبرې اترې وکړي. د فیډان په وینا؛ انقرې تل واشنګټن ته سپارښتنه کړې، چې د ایران سره ستونزې «یو په یو» حل کړي.
د ترکیې د بهرنیو چارو وزیر دا هم ویلي: «ما امریکایي چارواکو ته ویلي، چې د اټومي موضوع څخه پیل وکړئ او هغه پای ته ورسوئ، بیا نورو موضوعاتو ته ولاړ شئ».
