په جلاوطنۍ کې د افغان ښځو په نوم یو غورځنګ د یوې خبرپاڼې په خپرولو سره د طالبانو «جزايي اصولنامه» د بشري حقونو سیستماتیک نقض، د بېعدالتۍ او ښځو پر وړاندې د تبعیض څرګند سند بللی دی.
په خبرپاڼه کې راغلي، چې دغه اصولنامه د قانون پر وړاندې د برابرۍ اصل تر پښو لاندې کوي، د دفاع حق سلبوي. د دغه غورځنګ په وینا؛ دغه ټولې کړنې د افغانستان د پخواني جزا قانون او د عادلانه محاکمې له بنسټیزو اصولو سره په ټکر کې ده.
دغه غورځنګ ټینګار کړی، چې یاد مقررات نه قانوني مشروعیت لري او نه د عدالت، انساني کرامت او نړۍوالو بشري حقونو له معیارونو سره سمون لري. د خبرپاڼې له مخې؛ دغه جزايي نظام د ښځو د ځپلو او د وګړو د اساسي حقونو د لهمنځه وړلو وسیله ده او باید د یوه ناقانونه او د بشري حقونو سرغړوونکي نظام په توګه حساب ورکوونکی وګرځول شي.
د طالبانو د سترې محکمې ویاند عبدالرحیم راشد د یادې ډلې لهخوا د محاکمو د نوې جزایي اصولنامې محتوا تایید کړې ده.هغه ویلي، چې د افغانستان وګړي په «تعزیري جرمونو» تورن شي؛ نو د دوی د ټولنیزې ډلبندۍ پربنسټ به بېلابلې سزاوې ورکړل شي.
