د اسلاماباد یوې محکمې د سهیل اپریدي د نیولو حکم صادر کړی دی
د پاکستان د پلازمېنې اسلام اباد یوې محکمې د خیبر پښتونخوا د اعلی وزیر، سهیل اپريدي، د نیولو حکم صادر کړی دی.
د راپورونو له مخې، دا حکم د سهیل اپریدي د هغو څرګندونو په تړاو ورکړل شوی چې نوموړي د ۲۰۲۵کال په نومبر میاشت کې کړې وې.
ښاغلي اپریدي، هغه مهال ادعا کړې وه چې پاکستاني امنیتي ځواکونو په خیبرپښتونخوا کې جوماتونو ته سپي وروستي دي، دا هغه څرګندونې دي چې د دولتي بنسټونو پر وړاندې «ګمراه کوونکې» بلل شوي او د هغوی د اعتبار د زیانمنولو تور ورباندې لګېدلی دی.
د دغې قضیې قاضي، عباس شاه، ویلي چې سهیل اپریدی، سره له دې چې محکمې ته احضار شوی و، خو حاضر نه شو، له همدې امله د هغه د نیولو امر صادر شو.
محکمې ویلي چې د دې قضیې راتلونکې اورېدنه به د راتلونکې فبرورۍ میاشتې په ۱۰مه نېټه ترسره شي.
تر اوسه، پخپله سهیل اپریدي او یا هم د خیبرپښتونخوا حکومت په رسمي ډول د دې محکمې د پرېکړې په اړه کوم غبرګون نه دی ښودلی.
