کرېکټ بورډ د نړۍوال جام لپاره د ملي لوبډلې جامې رسنیزې کړې
د افغانستان کرېکټ بورډ د یوې خبرپاڼې او ویډیو په خپرولو سره د ۲۰۲۶ کال شل اوریز نړۍوال جام سیالیو لپاره د هېواد د کرېکټ ملي لوبډلې رسمي جامې نندارې ته وړاندې کړې. یادې ادارې ویلي، چې د دې جامو ډیزاین د افغانستان ښکلاوې منعکسوي او د ټولنې له رنګونو څخه الهام اخیستل شوی دی.
د خبرپاڼې په دوام کې راغلي، چې د دې کمېس په ډیزاین کې د افغاني ټولنې د کلتور او ښکلاو ځانګړې نښې نغښتې دي او د یو لوی ملت هوډ، اراده او استقامت یې په تار تار کې ځای پر ځای شوي دي. کرېکټ بورډ ټینګار کړی، چې دا جامې یوازې یو ورزشي سمبول نه، بلکې د ویاړونو د ترلاسه کولو لپاره د هیلو او لویو امیدونو نښه او د افغان ولس پر شونډو د موسکا راوستلو لپاره د یوې کلکې ارادې ښکارندویي کوي.
ټاکل شوې، چې د ۲۰۲۶ کال د شل اوریز نړۍوال جام لسم پړاو سیالۍ به د ۱۴۰۴ لمریز کال د سلواغې له ۱۸مې د کب تر ۱۷مې نېټې پورې د هندوستان او سريلانکا په ګډ کوربه توب ترسره شي.
د افغانستان د کرېکټ ملي لوبډله د دې سیالیو په څلورمه ډله کې له کاناډا، نیوزیلېنډ، سوېلي افریقا او د متحده عربي اماراتو له لوبډلو سره یوځای ده.
