د اروپايي پارلمان غړې هانا نیومن د طالبانو د جزایي اصولنامې په اړه غبرګون ښودلی. هغې ویلي، چې دغه سند د جنسیتي توپیر او د ښځو او نجونو غلامي په رسمیت پېژني. هغې ټینګار کړی، چې له طالبانو سره د اړیکو عادي کول د منلو وړ نهدي.
د اروپايي پارلمان دغه غړې د چهارشنبې په ورځ (د سلواغې ۸مه) پر اېکس پاڼه لیکلي: « د طالبانو د عادي کولو لپاره هیڅ ډول اړیکې د منلو وړ نهدي».
د طالبانو نوې جزایي اصولنامې په کور دننه او بهر سخت غبرګونونه راپارولي دي. تر دې وړاندې د ملګرو ملتونو د سرمنشي ویاند سټېفن دوجارېک د دغه سند په ځواب کې پر طالبانو غږ کړی، چې خپل تبعیضي قوانین او فرمانونه لغوه کړي.د پاکستان د علماوو شورا هم ټینګار کړی، چې د طالبانو جزایي اصولنامه د «اسلامي لارښوونو» سره سمون نهلري او «د قران او سنت» سره په ټکر کې ده. خو د طالبانو د عدلیې وزارت خبرداری ورکړی، چې د یادې ډلې د قوانینو په اړه هر ډول اعتراض «جرم» ګڼل کېږي او نیوکه کوونکي به قضايي او قانوني ادارو ته راجع شي.د طالبانو د مشر لهخوا لاسلیک شوې جزایي اصولنامه د ماشومانو وهل جرم نهګڼي، غلامي په رسمیت پېژني، نڅا جرم ګڼي او د طالبانو مخالفینو د وژلو اجازه ورکوي.
