د سویلي افریقا په ختیځ کوازولوناتال ایالت کې یوه کوچني بس او باروړونکې لارۍ ټکر کړی چې له امله یې لږ تر لږه ۱۱ کسان مړه شوي او اووه نور سخت ټپیان دي. دا پېښه نن د پنجشنبې په سهار وختي د ډربن ښار ته نږدې رامنځته شوې ده.
د ایالتي ترانسپورټ ادارې چارواکي سیبونیسو دوما ویلي، د لومړنیو معلوماتو له مخې، په وژل شویو کسانو کې یو د ښوونځي ماشوم هم شامل دی. د نوموړي په وینا، عیني شاهدانو ادعا کړې چې د لارۍ چلوونکي ناڅاپي موټر له یوه سړک څخه بل سړک ته واړوه ، چې له امله یې مخامخ ټکر رامنځته شو. چارواکو ویلي چې د پېښې په اړه به بشپړه پلټنه د ښاروالۍ او ملي پولیسو له خوا ترسره شي.
د بېړنیو مرستو ویاند ګیرېت جېمیسن ویلي، بس چلوونکی د موټر په اوسپنو کې بند پاتې و او د ژغورنې ډلې د هغه د راایستلو هڅې کولې. ټپیان نږدې روغتونونو ته لېږدول شوي دي.
دا پېښه یوازې څو ورځې وروسته له هغې شوې چې په یوه بل ایالت کې د ښوونځي د ماشومانو د لېږد یو وړوکی بس د یوې لارۍ سره ټکر وکړ او ۱۴ ماشومان پکې ووژل شول.
په سویلي افریقا او د افریقا په ډېرو هېوادونو کې د سړک خوندیتوب یوه جدي ستونزه بلل کېږي. د ملګرو ملتونو د معلوماتو له مخې، افریقا د نړۍ تر ټولو لوړه د ترافيکي مړینو کچه لري، چې هر کال شاوخوا ۳۰۰ زره کسان د سړکونو په پېښو کې مړه کیږي.
