په هند کې د «نیپا ویروس» د خپرېدو له راپورونو وروسته د پاکستان د روغتیا چارواکو په دغه هېواد کې د بېړني حالت خبرداری ورکړی. د پاکستان د روغتیا وزارت په وینا؛ دا مهال په پاکستان کې د نیپا ویروس کومه مثبته پېښه نهده ثبت شوې؛ خو د احتیاطي تدابیرو په توګه جدي اقدامات پیل شوي دي.
د پاکستان روغتیا وزارت ویلي، چې نیپا ویروس له څارویو انسان او همدارنګه له انسان څخه انسان ته انتقالېږي. د دغه ویروس لومړنۍ نښې تبه، سر درد، ټوخی، د بدن درد او کانګې بلل شوې دي.
پاکستاني چارواکو ویلي، چې ټول دولتي او خصوصي روغتونونه د چمتووالي په حال کې دي. همدارنګه د هند د نیپا ویروس د خپرېدو له امله د پاکستان په ټولو هوايي ډګرونو، بندرونو او ځمکنیو پولو کې د مساپرو د تګراتګ شرایط سخت شوي.
چارواکو زیاته کړې، چې له اغېزمنو او یا د لوړ ګواښ لرونکو سیمو څخه راغلي کسان به تر ځانګړې څارنې لاندې وي او پرته له بشپړې طبي معاینې به هېچا ته پاکستان ته د داخلېدو اجازه ورنه کړل شي.
د یادونې وړ ده، چې د هند په لوېدیځ بنګال ایالت کې تر اوسه لږترلږه پنځه د نیپا ویروس پېښې ثبت شوې دي.
