د طالبانو تر واک لاندې اريانا افغان هوايي شرکت وایي چې ددې شرکت طالب مشر، بخت الرحمن شرافت د فلای دبۍ شرکت له رییس حماد عبیدالله سره د یوه ګډ تفاهم پر بنسټ فلای دبۍ چمتو ده، ترڅو د اريانا افغان شرکت له لارې دبۍ ته انتقالېدونکي مسافر د نړۍ له نورو مهمو هوايي سکټورونو سره ونښلوي.
د طالبانو تر واک لاندې اریانا افغان هوايي شرکت نن جمعه، د سلواغې ۱۰مه په اېکس کې لیکلي، چې دغه تفاهم د مسافرينو د ټرانزيټ او هغوی ته د نويو اسانتیاوو رامنځته کولو، د سفر د وخت لنډولو او د مهمو نړیوالو الوتنو د پراختیا په برخه کې مهم ګام دی او د دواړو شرکتونو ترمنځ به د باور او ګډو ګټو نوی فصل پرانیزي.
اريانا افغان هوايي شرکت د مساپرينو د خوندیتوب، د سوداګرۍ د ودې او د هېواد د اقتصادي پیاوړتیا لپاره په دوامداره توګه د خپلو خدماتو د پراختیا او کیفیت لوړولو په لور ګامونه اخلي.
