سعودي عربستان د سوریې حکومت او کُرد ځواکونو د اوربند او ادغام پر سر له هوکړې هرکلی وکړ
سعودي عربستان د سوریې حکومت او د کُردانو تر مشرۍ لاندې د «سوریې ډیموکراتیک ځواکونو» (قسد-SDF ) تر منځ د اوربند له هوکړې هرکلی کړی. سعودي همداراز د سوریې د حاکمیت، ځمکنۍ بشپړتیا او یووالي د ساتنې په برخو کې له ټولو هڅو خپل ملاتړ څرګند کړی دی.
د سوریې حکومت او د کُردانو تر مشرۍ لاندې د «سوریې ډیموکراتیک ځواکونه» (قسد- SDF) د ټولشموله اوربند او د دې ډلې د پوځي او اداري بنسټونو په پړاویز ډول د مرکزي حکومت په جوړښت کې د ادغام پر سر هوکړې ته رسېدلي دي.
د سعودي عربستان د بهرنیو چارو وزارت د جمعې په ورځ (د سلواغې ۱۰مه) د یوې اعلامیې په خپرولو سره هیله څرګنده کړې، چې دغه هوکړه په سوریه کې د سولې او همداراز د ولس د هوساینې لامل شي.
د دغه وزارت د معلوماتو لهمخې، دغه هوکړه د سعودي عربستان او امریکا په هڅو رامنځته شوې او همداراز ریاض د سوریې له حکومت او د سوریې له ډیموکراتیک ځواکونو هم مننه کړې، چې د دوی غوښتنو ته یې غاړه اېښې ده.
د سوریې حکومت او کُرد ځواکونو د اوربند او ادغام پر سر هوکړې ته رسېدلي | افغانستان انټرنشنل پښتو
د سوریې د حکومتي چارواکو په وینا، دغه هوکړه پرون (پنجشنبه د سلواغې ۹مه) وروستۍ شوې او عملي کېدل یې هم سمدستي پیل شوي دي.
