افغانستان انټرنشنل پرون د خپلو سرچنیو په حواله د طالب استخباراتو لهخوا د غزني د مالستان ولسوالۍ د علماو شورا د پخواني مشر جان علي اکبري د نیولو خبر خپور کړی و. یوه ورځ وروسته د دغه ولایت سیمهییزو طالب چارواکو وویل، چې هغه یې د اداري فساد په تور نیولی دی.
په غزني کې د طالبانو رسنیز دفتر د جمعې په ورځ (د سلواغې ۱۰مه) په دې تړاو ویلي، چې جان علي اکبري څو ورځې وړاندې د یوشمېر جرمونو په تور د یادې ډلې استخباراتو نیولی. طالبانو ویلي، دغه کس په همدې ولسوالۍ کې د یوه دولتي ښوونځي مدیر و چې «د جعلي اسنادو په جوړېدو، خیالي زدهکوونکو ته د زمینې پر برابرولو او اداري فساد» په تور نیول شوی.
د طالبانو رسنیز دفتر وایي، چې د جان علياکبري دوسیه یې اړوندو ادارو ته سپارلې او د «اسلامي احکامو» سره سم به پرېکړه وکړي. تېره ورځ ځایي سرچینو افغانستان انټرنشنل ته ویلي و، طالبانو تر اوسه د دغه دیني عالم ته د خپلې کورنۍ له غړو او نږدې کسانو سره د لیدو اجازه نهده ورکړې. نوموړی (د مرغومي په ۲۸مه) نیول شوی او لاتر اوسه د هغه د وضعیت او برخلیک په اړه نور معلومات نهدي ترلاسه شوي. هغه ته نږدې کسانو افغانستان انټرنشنل ته ویلي، چې جان علي اکبري لومړی د یوه پخواني سیمهییز قوماندان د پوځي تجهیزاتو د ساتلو په تور نیول شوی و؛ خو تر څېړنو وروسته دغه تورونه پرې ثابت نه شول.
