ټېلګراف: د غزې جګړه او د ایران قتلعام د پرتله کولو وړ نه دي
تېلګراف ورځپاڼې په یوه راپور کې لیکلي، هغه څه چې دا مهال په ایران کې روان دي جګړه نه ده، بلکې یو ډلهییز قتلعام دی.
ټېلګراف زیاته کړه، په ایران کې د بېګناه قربانیانو کره شمېر لا تر اوسه معلوم نه دی، خو داسې ښکاري چې د ایران حکومت تر دې دمه د غزې د تلفاتو په پرتله ډېر ملکي وګړي وژلي دي او یا لږ تر لږه د هماغه شمېر د اوښتو په درشل کې دی.
د ټېلګراف د راپور لهمخې، د غزې د جګړې وضعیت او په ایران کې روان قتلعام د پرتله وړ نه دي. د فلسطینیانو تلفات د ښاري جګړې نا غوښتل شوې پایله وه؛ له داسې دوښمن سره جګړه چې شخړه یې پيل کړه او له هرې مرګژوبلې یې د تبلیغ لپاره ګټه واخیسته، خو برعکس د ایران حکومت هغه بېوسلې وګړي چې د ازادۍ غوښتنه کوي، د مرګوني ځپلو او سخت سرکوب هدف ګرځولي دي.
ټېلګراف همدارنګه لیکلي دي: «سره له دې چې د غزې جګړه د نړۍوالو رسنیو له پراخ پوښښ څخه برخمنه ده، خو په ایران کې پر ځپلو ډېر لږ تمرکز شوی دی. په هغه ورځ چې د ټایم مجلې د وژل شویو شمېر له ۳۰ زرو د اوښتو خبر ورکړ، د بيبيسي او سکاینیوز په خپرونو کې د ایران په اړه هېڅ راپور نه ترسترګو کېده».
ټېلګراف همدارنګه په ایران کې د ځپلو پر وړاندې د لوېدیځو دولتونو او د ځینو مشهورو څېرو پر کمرنګه غبرګون نیوکه کړې او لیکلي یې دي، چې د بشري حقونو په اړه د پراخو ادعاوو سره سره، د ایران د حکومت پر ضد تر اوسه کوم اغېزمن او عملي اقدام نه دی شوی.
