د طالبانو د امر بالمعروف او شکایتونو اورېدو وزارت وایي، په هرات ولایت کې د صندلۍ جوړېدو باندې د بندیز په اړه خپرې شوې اوازې بېبنسټه دي او دا وزارت صندلۍ «غېر اسلامي» نه ګڼي.
د دې وزارت ویاند د جمعې په ورځ د (سلواغې ۱۰مه) خپله اېکسپاڼه کې لیکلي، دا اداره «هېڅ داسې حکم نه صادروي چې د اسلامي شریعت خلاف وي».
د خبرپاڼې په متن کې راغلي، چې په هرات ولایت کې امربالمعروف ته د ځینو کړنو نسبت ورکول «عاقلانه کار نه دی» او دا ډول ادعاوې د «بېاساسه اوازو او مغرضانه تبلیغاتو» برخه دي. یاد وزارت زیاتوي، ځینې کسان او کړۍ د «ناسمو تورونو او غېرواقعي کړنو» په نسبت ورکولو سره هڅه کوي چې د دې ادارې څېره زیانمنه کړي.
په وروستیو اوونیو کې، په هرات کې د طالبانو د امر بالمعروف د مأمورانو کړنې څو ځله د خلکو غبرګونونه راپارولي دي. له دې ډلې، د هرات پوهنتون د طب پوهنځي د محصلینو د فراغت په مراسمو کې د دغو محتسبانو لاسوهنه یادولی شو.
د جمعې په شپه، د مرغومي د میاشتې په ۲۶مه، د دې مراسمو پر مهال طالبانو فارغو شویو محصلینو ته امر وکړ، چې خپلې نېکټايانې خلاصې کړي. همداراز، د مرغومي د میاشتې په لړ کې د طالبانو د امر بالمعروف مأمورانو هغو ښځو ته چې مانتو یا اوږدې چپنې یې اغوستې وې، د هرات ښار ته د ننوتلو اجازه نه ورکوله.
د طالبانو د امر بالمعروف او شکایتونو اورېدو وزارت هغه اداره ده، چې د خلکو پر فردي او ټولنیز چلند څارنه کوي او د طالبانو قوانین عملي کوي. یادې ادارې د طالبانو له واک ته رسېدو وروسته د پخوانیو ډېرو مدني او حقوقي بنسټونو ځای نیولی او د هېوادوالو په ورځني ژوند کې پراخ رول لري.
