د ګوګل یو پخوانی انجنیر د چین لپاره د تخنیکي رازونو د غلا په تړاو مجرم وپېژندل شو

نوموړي دا محرم معلومات له دوو چینایي شرکتونو سره شریک کړي وو، هغه شرکتونه چې ورسره یې په پټه همکاري کوله. لېن‌وې ډینګ له ۱۱ ورځنۍ محاکمې وروسته، د «اقتصادي جاسوسۍ» په اوو تورونو او همدارنګه د «سوداګریزو رازونو د غلا» په اوو نورو تورونو کې ګناهکار وپېژندل شو. پر نوموړي تور دی، چې زرګونه مخه محرم او حساس معلومات یې له ګوګل څخه غلا کړي دي.

د امریکا د قوانینو له‌مخې، د اقتصادي جاسوسۍ هر تور تر ۱۵ کلونو د بند سزا او تر ۵میلیونه ډالرو جریمه لري او د سوداګریزو رازونو د غلا هر تور تر ۱۰ کلونو بند او ۲۵۰ زره ډالرو جریمې سبب کېدای شي.

د رویټرز خبري اژانس د راپور له‌مخې، د امریکا د عدلیې وزارت څارنوالانو ویلي، چې ډینګ د ګوګل د مصنوعي ځیرکتیا د لویو ماډلونو د روزنې لپاره کارېدونکو سافټوېرونو اړوند مهم معلومات غلا کړي دي.

په دغو غلا شویو معلوماتو کې، د ځینو پرمختللو چپونو هغه وسایل هم شامل دي چې ګوګل ته یې دا توان ورکاوه، چې د کلاوډ ټکنالوژۍ له سترو شرکتونو لکه امازون او مایکروسافټ سره سیالي وکړي او پر «انویدیا» شرکت د چپونو خپل تړاو راکم کړي.

د قضايي چارواکو په وینا، لېن‌وې ډینګ د ۲۰۱۹ کال د مې په میاشت کې له ګوګل شرکت سره یو ځای شو، خو وروسته له هغه چې په چین کې د یوې نوې ټکنالوژۍ کمپنۍ له‌خوا ورته د کار وړاندیز وشو، نوموړي د ګوګل د تخنیکي رازونو غلا پیل کړه.

ټاکل شوې، چې محکمه د سلواغې په ۱۴مه د هغه د بند او نغدي جریمې وروستۍ پرېکړه اعلان کړي.