په داسې حال کې چې د تهران او واشنګټن ترمنځ ترینګلتیا په چټکۍ سره د زیاتېدو په حال کې ده، د اوکراین ولسمشر ولاودیمیر زېلېنسکي خبرداری ورکړ چې دا وضعیت کولی شي د کییف او مسکو ترمنځ د سولې د مذاکراتو بهیر له خنډ او ځنډ سره مخ کړي.
کییف پوسټ ورځپاڼې د جمعې په ورځ د سلواغې پر ۱۰مه په یوه راپور کې د زېلېنسکي له قوله ولیکل: «زموږ د ارزونو لهمخې، د امریکا او ایران ترمنځ د وضعیت په تړاو ځینې پېښې د رامنځته کېدو په حال کې دي او دا موضوع کولی شي د مذاکراتو پر مهالوېش اغېز وکړي».دا په داسې حال کې ده، چې د اوکرایني او روسي پلاویو ترمنځ ناسته د سلواغې د ۱۲مې لپاره په ابوظبي کې پلان شوې ده.د اوکراین اندېښنه په داسې حال کې مطرح کېږي، چې د مارکو روبیو په ګډون امریکايي چارواکو خبرداری ورکړی، چې متحده ایالات باید د ایران پر وړاندې د مخنیوونکي اقدام لپاره چمتو وي.د روسیې له لوري پر اوکراین د جګړې له پیل راهیسې، مسکو ته د تهران پراخې مرستې او روسیې ته د ځانمرګو بېپیلوټه الوتکو سپارل، کییف د نړۍوالې کچې په ډګر کې د ایران له جدي مخالفانو څخه ګرځولی دی.د ملګرو ملتونو د بشري حقونو شورا کې د اوکراین استازي د سلواغې په لومړۍ نېټه د دې شورا په بېړنۍ ناسته کې چې په ایران کې د اعتراضونو د ځپلو په اړه جوړه شوې وه، له نړۍوالې ټولنې وغوښتل چې پر ایران ډیپلوماټیک فشارونه زیات کړي.هغه د ایران د معترضینو وضعیت ته په اشارې سره ټینګار وکړ، چې اوکراین د ایران د خلکو تر څنګ ولاړ دی.
د امریکا د خزانهدارۍ وزارت د جمعې په ورځ (د سلواغې ۱۰مه) د یوې خبرپاڼې په خپرولو سره د ایران حکومت ته د «رژیم» په خطاب کولو سره په دغه هېواد کې د معترضینو ځپنه «وحشیانه» بللې او یاد چارواکي یې د زرګونه معترضینو د وژنې مسوولین ګڼلي دي.
په دغو تحریم شویو کسانو کې د ایران د کورنیو چار وزیر سکندر مومني، د سپاه پاسداران د اطلاعاتو سازمان مسوول مجید خادمي، په تهران کې د سپاه سیدالشهدا قومندان قربان محمد ولیزاده، په همدان کې د سپاه پاسداران قومندان حسین کمالي، په ګیلان کې د سپاه پاسداران قومندان حمید دمغاني، د کرامانشاه ولایت لپاره د لبنان د وسلهوالو ځواکونو قومندان مهدي حاجیان شامل دي.
د امریکا د خزانهدارۍ وزارت وايي، یاد کسان د زرګونه معترضینو د وژنې مسوولین دي او له اعتراض کوونکو سره یې تر ټولو ډېر بد چلند کړی او ان دا چې پر معترضینو یې د مخامخ ډزو امر هم کړی دی.
له دې سربېره یو ایران پانګهوال بابک مرتضی زنجاني هم تحریم شوی او د امریکا په وینا، یاد کس د ایران له نفتي موادو ترلاسه شوي میلیاردونه ډالره چې اصلا د ایران ولس حق کېږي، اختلاس کړي او همداراز هغه یې د سپاه پاسداران یو له مهمو مالي تمویلوونکو بللی دی.
د دغه وزارت د معلوماتو لهمخې، بابک مرتضی زنجاني چې د میلمستونونو، ټرانسپورټ، ټېکنالوژۍ، مالي خدماتي چارو او همداراز د نفتي موادو پر صادراتو بوخت دی په ۲۰۱۶ کال کې په نفتي موادو کې د میلیاردونو ډالرو د اختلاس له امله په اعدام محکوم شو، خو په ۲۰۲۴ کال کې یې په حکم کې تخفیف راغی او د سپاه پاسداران یو له مهمو مالي تمویلوونکو دی.
د یاد وزارت په خبرپاڼه کې راغلي، د یادو کسانو ټولې هغه شتمنۍ چې په امریکا او یا هم د امریکایانو په واک کې دي کنګل شوي او هغه کسان او بنسټونه به چې ورسره په مستقیم او غېر مستقیم ډول اړیکې ولري له ورته چلند سره مخ شي.
د امریکا د خزانهدارۍ وزیر اسکاټ بنسټ ویلي: «د سوکاله ایران د جوړولو پر ځای، رژيم پرېکړه کړې چې د دغه هېواد نفتي عواید د اټومي او توغندیزو چارو پر پراخولو او په ټوله نړۍ کې د نیابتي ترهګرو ډلو پر ملاتړ ولګوي».
د یادونې وړ ده، چې دغه وزارت تېر کال هم د ایران په نفتي چارو کې ښکېل ۸۷۵ کسان تحریم کړي وو.