د اروپا کمېسیون: په ایران کې به د ازادۍ ځپل بېځوابه پاتې نهشي
د اروپا کمېسیون وایي، په ایران کې د ازادۍ ځپل به بېځوابه پاتې نهشي او دوی د اروپايي ټولنې د شورا د پرېکړې هرکلی کوي. د کمېسیون په خبره: «دې پرېکړه کې نوي محدودیتونه لکه د شتمنیو کنګل، اروپايي ټولنې ته پر سفر بندیز او لېست شويو کسانو ته د اقتصادي سرچینو د لېږد مخنیوی شامل دي».
د اروپايي ټولنې د شورا د جمعبندۍ پر بنسټ، دغه ټولنه به د ملګرو ملتونو د ټولو بشري حقونو په بنسټونو کې ایران د ۲۰۲۶ کال لپاره د خپلو بشري حقونو په لومړیتوبونو کې راولي او په ایران کې د بشري حقونو د سرغړونې موضوع به د یوې اصلي محورې موضوع په توګه وڅاري.
اروپايي ټولنې په دې ټینګار سره چې په ایران کې د بشري حقونو د سرغړونکو د معافیت پر وړاندې د مبارزې او د اسلامي جمهوري دولت د چارواکو د ځواب ویلو لپاره له ټولو څو اړخیزو وسیلو څخه ګټه اخلي، وویل چې د حقیقت موندنې د نړۍوالو میکانیزمونو ملاتړ، د اسنادو راټولول او له ایران سره په تړاو د قضايي تعقیب چارې به په ۲۰۲۶ کال کې د دغې ټولنې د فعالې تګلارې برخه وي.
