ایران د خپلو وګړو د اړتیاوو د پوره کولو پر ځای د وسلهوالو ډلو تمویل ته لومړیتوب ورکوي
د امریکا د بهرنیو چارو وزارت د هغو نویو بندیزونو په یادولو سره چې د ایراني چارواکو پر ضد لګول شوي، ویلي دي چې د ایران حکومت لا هم د خپلو وګړو د لومړنیو اړتیاوو د پوره کولو پر ځای، له هېواده بهر د وسلهوالو ډلو تمویل او پراخو تسلیحاتي پروګرامونو ته لومړیتوب ورکوي.
د امریکا د بهرنیو چارو وزارت زیاته کړې، چې د ایران خلک د لوړ انفلاسیون، زړو بنسټیزو زېربناوو او د اوبو او برېښنا له کمښت سره لاس او ګرېوان دي، ځکه د دغه هېواد شتمني د حکومت په ویجاړونکو فعالیتونو کې ضایع شوې ده.
په دې اعلامیه کې ټینګار شوی، چې متحده ایالات د ایران د فاسد او ځپونکي حکومت پر وړاندې د دغه هېواد د خلکو له اعتراضونو ملاتړ کوي او د ایران شپږ تنه چارواکي چې پر هغو امنیتي ځواکونو یې څارنه کوله چې د اعتراض کوونکو په خونړيو ځپلو کې مسوول وو، له یوه ایراني پانګهوال سره یوځای چې د ایران د خلکو ملیاردونه ډالره شتمني یې اختلاس کړې وه، تر بندیزونو لاندې راغلي دي.
د امریکا د بهرنیو چارو وزارت همداراز وایي، چې واشنګټن د ایران د حکومت د هغو مالي سرچینو د وچولو لپاره چې په بېثباته کوونکو او ویجاړونکو فعالیتونو کې ترې ګټه اخلي، پر تهران د "اعظمي فشار" سیاست ته دوام ورکوي.
