د ایران د زاهدان ښار د اهلسنت امام مولانا عبدالحمید په دې هېواد کې پر روان وضعیت سختې نیوکې کړي. هغه وایي، د خلکو پراخه نارضایتي او د چارواکو لهخوا د ولس غوښتنو ته نه پاملرنې، ایران جدي ناورین سره مخ کړی. دی زیاتوي، په ایران کې وژل شوي کسان بلواګر نه، بلکې معترضین وو.
مولانا عبدالحمید ټینګار کړی، چې د ایران د روان ناورین د حل تر ټولو غوره لاره د ولس غوښتنو ته غوږ نیول او د هغو منل دي. نوموړي زیاته کړې، چې اعتراض کوونکی ولس وژل شوی او په ایران کې یوه لویه فاجعه رامنځته شوې ده. هغه د دیني نصوصو په حواله وویل، د یو بېګناه انسان د وینې ناحقه تویول د ټولو انسانانو د وژنې برابر ګناه ده.
دې دیني عالم خبرداری ورکړی، په داسې حال کې چې ایران د جګړې له جدي ګواښ سره هم مخ دی، اړینه ده چې د خلکو غوښتنو ته غاړه کېښودل شي، ځکه د هغه په وینا، هېڅ حکومت د ولس له ملاتړ پرته نهشي کولای د بهرنیو ګواښونو پر وړاندې مقاومت وکړي.
مولانا عبدالحمید همدارنګه ټینګار کړی، چې حکومت هغه مهال مشروع او اغېزمن بلل کېدای شي چې د خلکو د هوساینې او امنیت لپاره کار وکړي. هغه وویل، کله چې خلک په بېوزلۍ او ناامنۍ کې ژوند کوي، واکمنان هم باید ارام ونه اوسي، بلکې باید د خلکو تر څنګ ودرېږي او د هېواد د ستونزو د حل لپاره ګډې هڅې وکړي.
مولانا عبدالحمید اسماعیلزهی د زاهدان د اهلسنت امامجمعه، د ایران د سیستان او بلوچستان ولایت له پېژندل شویو سني علماوو او له اغېزناکو مذهبي څېرو څخه دی. د هغه د جمعې خطبې په وروستیو کلونو کې د سیاسي، ټولنیزو مسایلو او د خلکو د غوښتنو د مطرح کولو له امله په رسنیو کې پراخ انعکاس موندلی دی.
د امریکا د خزانهدارۍ وزارت د جمعې په ورځ (د سلواغې ۱۰مه) د یوې خبرپاڼې په خپرولو سره د ایران حکومت ته د «رژیم» په خطاب کولو سره په دغه هېواد کې د معترضینو ځپنه «وحشیانه» بللې او یاد چارواکي یې د زرګونه معترضینو د وژنې مسوولین ګڼلي دي.
په دغو تحریم شویو کسانو کې د ایران د کورنیو چار وزیر سکندر مومني، د سپاه پاسداران د اطلاعاتو سازمان مسوول مجید خادمي، په تهران کې د سپاه سیدالشهدا قومندان قربان محمد ولیزاده، په همدان کې د سپاه پاسداران قومندان حسین کمالي، په ګیلان کې د سپاه پاسداران قومندان حمید دمغاني، د کرامانشاه ولایت لپاره د لبنان د وسلهوالو ځواکونو قومندان مهدي حاجیان شامل دي.
د امریکا د خزانهدارۍ وزارت وايي، یاد کسان د زرګونه معترضینو د وژنې مسوولین دي او له اعتراض کوونکو سره یې تر ټولو ډېر بد چلند کړی او ان دا چې پر معترضینو یې د مخامخ ډزو امر هم کړی دی.
له دې سربېره یو ایران پانګهوال بابک مرتضی زنجاني هم تحریم شوی او د امریکا په وینا، یاد کس د ایران له نفتي موادو ترلاسه شوي میلیاردونه ډالره چې اصلا د ایران ولس حق کېږي، اختلاس کړي او همداراز هغه یې د سپاه پاسداران یو له مهمو مالي تمویلوونکو بللی دی.
د دغه وزارت د معلوماتو لهمخې، بابک مرتضی زنجاني چې د میلمستونونو، ټرانسپورټ، ټېکنالوژۍ، مالي خدماتي چارو او همداراز د نفتي موادو پر صادراتو بوخت دی په ۲۰۱۶ کال کې په نفتي موادو کې د میلیاردونو ډالرو د اختلاس له امله په اعدام محکوم شو، خو په ۲۰۲۴ کال کې یې په حکم کې تخفیف راغی او د سپاه پاسداران یو له مهمو مالي تمویلوونکو دی.
د یاد وزارت په خبرپاڼه کې راغلي، د یادو کسانو ټولې هغه شتمنۍ چې په امریکا او یا هم د امریکایانو په واک کې دي کنګل شوي او هغه کسان او بنسټونه به چې ورسره په مستقیم او غېر مستقیم ډول اړیکې ولري له ورته چلند سره مخ شي.
د امریکا د خزانهدارۍ وزیر اسکاټ بنسټ ویلي: «د سوکاله ایران د جوړولو پر ځای، رژيم پرېکړه کړې چې د دغه هېواد نفتي عواید د اټومي او توغندیزو چارو پر پراخولو او په ټوله نړۍ کې د نیابتي ترهګرو ډلو پر ملاتړ ولګوي».
د یادونې وړ ده، چې دغه وزارت تېر کال هم د ایران په نفتي چارو کې ښکېل ۸۷۵ کسان تحریم کړي وو.
