د افغانستان د مخکېني جمهوري نظام د ولسمشر مرستیال امرالله صالح د امریکا د سنا د بهرنیو اړیکو له کمېټې څخه مننه کړې، چې د طالبانو تر کنټرول لاندې افغانستان ته د امریکا د مرستو د درولو لایحه یې تصویب کړې ده. هغه په دې تړاو یوه پېغام کې طالبان د «تاریخ تر ټولو لوی غله» بللي دي.
هغه نن جمعه (د سلواغې ۱۰مه) پر اېکسپاڼې یوې لیکنه کې زیاته کړې، چې پر کابل واکمنه دا ډله «خپل جنایتونه د ږیرې، پګړۍ او ریاکارانه دیندارۍ تر شا پټوي».
د امریکا د سنا د بهرنیو اړیکو کمېټې د پنجشنبې په ورځ د (سلواغې ۹مه) هغه لایحه تصویب کړه، چې موخه یې د طالبانو تر واک لاندې افغانستان ته د امریکا د مرستو بندول دي. که دا لایحه په قانون بدله شي، لږ تر لږه ۶۳۱ مېلیونه ډالره چې د افغانستان د بیارغونې لپاره ځانګړي شوي وو، د امریکا د خزانې وزارت ته به بېرته وسپارل شي.
امرالله صالح په خپله لیکنه کې د امریکا د استازو جرګې د غړي ټیم بورچټ او د هغه د ټیم له هڅو مننه کړې او هیله یې څرګنده کړې، چې «د دې لایحې له پرمختګ سره، د لابيګرو غېر دولتي بنسټونو له لوري د تېښتې هېڅ لاره رامنځته نهشي او تر هېڅ پلمې لاندې طالبانو ته پیسې ورنه کړل شي».
د افغانستان د پخواني حکومت د ولسمشر مرستیال ادعا کړې، چې د امریکا د مرستندویو مرستو له مجموعې څخه شاوخوا ۱۱۰ مېلیونه ډالر د طالبانو په خزانه کې پراته دي.
تر دې وړاندې، د ۱۴۰۲ لمریز کال د مرغومي میاشتې په وروستیو کې د امریکا د بهرنیو چارو وزارت د افغانستان لپاره د امریکا ځانګړي سرمفتش دفتر (سیګار) ته تایید کړې وه، چې په هرو ۱۰ تر ۱۴ ورځو کې، ۸۰ مېلیونه ډالره نغدې پیسې د طالبانو تر کنټرول لاندې افغانستان ته لېږي.
