یوه لوېدیځه سرچینه چې د امریکايي او اسراییلي چارواکو ترمنځ د همغږۍ له ناستو خبره ده، ویلي دي چې په واشنګټن او اورشلیم کې د پرېکړهکوونکو په غونډو کې پر ایران پوځي برید حتمي بلل کېږي او اصلي اختلاف یوازې د عملیاتو د پیل پر وخت پورې محدود دی.
سرچینې د نوم نه ښودلو په شرط ویلي، اوس په ناستو کې اصلي پوښتنه دا نه ده چې برید به کېږي او که نه؛ بلکې دا ده چې مناسب عملیاتي او سیاسي فرصت به کله برابر شي؛ داسې فرصت چې ښايي په راتلونکو څو ورځو کې میسر شي او یا هم څو اوونۍ وخت ونیسي.دا په داسې حال کې ده، چې د امریکا ولسمشر ډونالډ ټرمپ د جمعې په ورځ د سلواغې پر ۱۰مه یو ځل بیا اعلان وکړ: «د امریکا د سمندري ځواکونو یوه لویه بېړۍ د ایران په لور د حرکت په حال کې ده او دا کښتۍ تر هغو لویې دي چې ونزویلا ته استول شوې وې».هغه زیاته کړه: «هیله لرو چې له ایران سره یوې هوکړې ته ورسېږو. که هوکړه وشي، ښه ده؛ که هوکړه ونهشي، بیا به وګورو چې څه کېږي. خو حالات به ډېر حساس او هیجاني وي.»پر ایران د امریکا د برید د احتمال له ډېرېدو سره هممهاله، د ایران د بهرنیو چارو وزیر عباس عراقچي ترکیې ته د سفر پر مهال اعلان وکړ، چې تهران به «هېڅکله» د خپل توغندیز پروګرام پر سر خبرې اترې ونهکړي. د ایران د حکومت توغندیز پروګرام یو له هغو مواردو څخه دی، چې د امریکا ولسمشر یې له تهران سره د مذاکرې غوښتونکی دی.
د امریکا د خزانهدارۍ وزارت د جمعې په ورځ (د سلواغې ۱۰مه) د یوې خبرپاڼې په خپرولو سره د ایران حکومت ته د «رژیم» په خطاب کولو سره په دغه هېواد کې د معترضینو ځپنه «وحشیانه» بللې او یاد چارواکي یې د زرګونه معترضینو د وژنې مسوولین ګڼلي دي.
په دغو تحریم شویو کسانو کې د ایران د کورنیو چار وزیر سکندر مومني، د سپاه پاسداران د اطلاعاتو سازمان مسوول مجید خادمي، په تهران کې د سپاه سیدالشهدا قومندان قربان محمد ولیزاده، په همدان کې د سپاه پاسداران قومندان حسین کمالي، په ګیلان کې د سپاه پاسداران قومندان حمید دمغاني، د کرامانشاه ولایت لپاره د لبنان د وسلهوالو ځواکونو قومندان مهدي حاجیان شامل دي.
د امریکا د خزانهدارۍ وزارت وايي، یاد کسان د زرګونه معترضینو د وژنې مسوولین دي او له اعتراض کوونکو سره یې تر ټولو ډېر بد چلند کړی او ان دا چې پر معترضینو یې د مخامخ ډزو امر هم کړی دی.
له دې سربېره یو ایران پانګهوال بابک مرتضی زنجاني هم تحریم شوی او د امریکا په وینا، یاد کس د ایران له نفتي موادو ترلاسه شوي میلیاردونه ډالره چې اصلا د ایران ولس حق کېږي، اختلاس کړي او همداراز هغه یې د سپاه پاسداران یو له مهمو مالي تمویلوونکو بللی دی.
د دغه وزارت د معلوماتو لهمخې، بابک مرتضی زنجاني چې د میلمستونونو، ټرانسپورټ، ټېکنالوژۍ، مالي خدماتي چارو او همداراز د نفتي موادو پر صادراتو بوخت دی په ۲۰۱۶ کال کې په نفتي موادو کې د میلیاردونو ډالرو د اختلاس له امله په اعدام محکوم شو، خو په ۲۰۲۴ کال کې یې په حکم کې تخفیف راغی او د سپاه پاسداران یو له مهمو مالي تمویلوونکو دی.
د یاد وزارت په خبرپاڼه کې راغلي، د یادو کسانو ټولې هغه شتمنۍ چې په امریکا او یا هم د امریکایانو په واک کې دي کنګل شوي او هغه کسان او بنسټونه به چې ورسره په مستقیم او غېر مستقیم ډول اړیکې ولري له ورته چلند سره مخ شي.
د امریکا د خزانهدارۍ وزیر اسکاټ بنسټ ویلي: «د سوکاله ایران د جوړولو پر ځای، رژيم پرېکړه کړې چې د دغه هېواد نفتي عواید د اټومي او توغندیزو چارو پر پراخولو او په ټوله نړۍ کې د نیابتي ترهګرو ډلو پر ملاتړ ولګوي».
د یادونې وړ ده، چې دغه وزارت تېر کال هم د ایران په نفتي چارو کې ښکېل ۸۷۵ کسان تحریم کړي وو.