په کانګو کې د یوه کان د نړېدو له امله څه باندې ۲۰۰ کسان مړه شوي
د کانګو په ختیځ کې د کولتان کان د نړېدو له امله څه باندې ۲۰۰ کسان مړه شوي دي. دغه کان د تېرې چهارشنبې په ورځ نړېدلی او د جمعې تر ماښامه د مړو شمېر معلوم نهوو. د کانګو د ختیځې ډېری سیمې د اېم۲۳ یاغي ډلې تر کنټرول لاندې دي.
د جمعې په ورځ (د سلواغې ۱۰مه) د یاغیانو یوه مسوول رویټرز خبري اژانس ته ویلي، دغه پېښه د تېرې چهارشنبې په ورځ په روبایا سیمه کې د کولتان په کان کې رامنځته شوې ده. په دغه کان کې خلک له هر ډول محافظتي چارو پرته په ډېر ابتدایي ډول کېندنې کوي.
روبایا د نړۍ شاوخوا ۱۵ سلنه کولتان تولیدوي. له کولتان څخه ټانټالم جوړېږي؛ دا د تودوخې پر وړاندې یو مقاوم فلز دی چې د موبایل، کمپیوټر، د هوايي صنعت د پرزو او د ګاز توربینونو په جوړولو کې کارول کېږي.
روبایا سیمه له ۲۰۲۴ کال راهیسې د AFC/M23 یاغي ډلې تر کنټرول لاندې ده.
د یادې یاغي ډلې یوه مسوول رویټرز ته ویلي: «موږ د بارانونو په موسم کې یو. ځمکه نرمه ده. همدا ځمکه وه چې هغه مهال ونړېده کله چې قربانیان د کندې دننه وو».
له دې سره سم، یوې سرچینې رویټرز خبري اژانس ته په یاده پېښه کې د مړه شویو کسانو شمېر چې پهکې ښځې او ماشومان هم شامل دي، ۲۲۷ ښودلی دی.
ملګرو ملتونو ویلي، چې AFC/M23 یاغي ډله د خپلو یاغیګریو د تمویل لپاره د روبایا شتمنۍ لوټ کړې ده. داسې ویل کېږي، چې دغه ډله د ګاونډي هېواد روانډاحکومت له ملاتړ څخه برخمنه ده، روانډا بیا دغه ادعاوې رد کړې دي.
د یادونې وړ ده، دغو یاغي وسلهوالو چې ادعا کوي موخه یې په کینشاسا کې د حکومت نسکورول او د کانګو د توتسي لږکي خوندیتوب ده، تېر کال د چټک پرمختګ پر مهال د ګران بیه کاني زېرمو په ګډون د ختیځې کانګو ډېرې برخې نیولې دي.
