د امریکا مرکزي قومندانۍ (سېنټکام) خبرداری ورکړی چې په هرمز تنګي کې د ایران د سپاه پاسداران لهخوا به هېڅ ډول غیرمحفوظ او غیرمسلکي اقدامات ونه زغمي. تر دې وړاندې ایران ویلي وو چې یکشنبه به یې ځواکونه په هرمز کې پوځي تمرینونه وکړي.
سېنټکام ټینګار کړی چې سپاه پاسداران باید په سمندر کې له هر ډول پاروونکو او تحریکوونکو کړنو ډډه وکړي.
د امریکا مرکزي قومندانۍ ویلي، د هرمز له تنګي هره ورځ له ۱۰۰ډېر تجارتي کښتۍ تېرېږي او د ایران دا ډول مشقونه باید خوندي، مسلکي او د نړیوالو سمندري اصولو سره سم ترسره شي، څو د نړیوالې سمندري تګراتګ ازاد بهیر له ګواښ سره مخ نه کړي.
سېنټکام خبرداری ورکړی چې د امریکايي ځواکونو، سیمهییزو شریکانو او تجارتي بېړیو ته نږدې هر ډول غیرمحفوظ او غیرمسلکي چلند د ټکر او خطر سبب کېدای شي.
په پای کې، سېنټکام ټینګار کړی چې د سپاه پاسداران له لوري به هېڅ ډول غیرمحفوظ اقدام ونه زغمي او د امریکايي سرتېرو، بېړیو او الوتکو د خوندیتوب لپاره به لازم اقدامات وکړي.
دا په داسې حال کې ده، چې د ایران او امریکا ترمنځ اړیکې له اوږدې مودې راهیسې ترینګلې دي او په دې وروستیو کې د پوځي نښتې او د امریکا لهخوا پر ایران د احتمالي برید اوازې زیاتې شوې دي.
تر دې وړاندې د امریکا ولسمشر ډونالډ ټرمپ د جمعې په ورځ د سلواغې پر ۱۰مه یو ځل بیا اعلان وکړ: «د امریکا د سمندري ځواکونو یوه لویه بېړۍ د ایران په لور د حرکت په حال کې ده او دا کښتۍ تر هغو لویې دي چې ونزویلا ته استول شوې وې».
