د طالبانو عامې روغتیا وزارت وايي، د دغه وزارت د هڅو په پایله کې د Doctors of Rahman خیریه بنسټ اړوند ۱۲ ډاکټران د شنبې په ورځ افغانستان ته ورسېدل. دغه ډاکټران به په بېلابېلو برخو کې د یوې اونۍ لپاره له نورو چارو سربېره په روغتیايي مرکزونو کې د ناروغانو درملنه هم وکړي.
د Doctors of Rahman خیریه بنسټ برېتانیا کې فعالیت لري او په دې یو اونیز طبي ماموریت کې د امریکا، انګلستان، هند، لبنان، قطر او یو شمېر نورو هېوادونو د اورتوپیدي، زړه، عمومي جراحي، انستیزي، بیړني طب، سترګو او سرطان ناروغیو درملنې برخو کې ۱۲ متخصص ډاکټران شامل دي.
د طالبانو د عامې روغتیا وزارت د یاد ماموریت موخه د افغانستان د روغتیايي سکتور پیاوړتیا، د تخصصي درملنې پراختیا، د طبي تجهیزاتو برابرول او د افغان روغتیايي کارکوونکو ظرفیت لوړول بولي.
دغه وزارت د یوې خبرپاڼې په خپرولو سره ویلي، یاد ډاکټران به د یوې اونۍ په ترڅ کې په ټاکل شویو روغتیايي مرکزونو کې ناروغانو ته روغتیايي خدمتونه هم وړاندې کړي.
یاد وزارت دغه طبي ماموریت د افغانستان د روغتیايي سیستم د پیاوړتیا، د تخصصي درملنې د پراختیا او له نړۍوالو خیریه بنسټونو سره د رغنده همکاریو په برخه کې یو مهم ګام بللی دی.
