د پاکستان د کورنیو چارو وزیر مُحسن نقوي ادعا کړې، چې په بلوچستان کې د شنبې ورځې د بریدونو پلان هند جوړ کړی او همداراز یې خبرداری ورکړی، چې د یادو بریدونو طرحه کوونکي به ونهبښي. هند لا تر اوسه د پاکستان د دغې ادعا په اړه څه نهدي ویلي، خو تر دې مخکې یې ورته تورونه رد کړي دي.
د پاکستان د کورنیو چارو وزیر مُحسن نقوي او د بلوچستان اعلی وزیر سرفراز بګټي په یاد ایالت کې د شنبې ورځې د بریدونو په تړاو له رسنیو سره په خبرو کې ادعا وکړه، چې د یادو بریدونو تر شا د هند لاس دی.
محسن نقوي ویلي: «ترهګرو د یوه منظم پلان لهمخې بریدونه کړي، امنیتي ځواکونو یې مقابله وکړه، هر ترهګر چې راغلی وو، بېرته ژوندۍ نهدی تللی او هغوی یو یو لټول شوي او وژل شوي دي».
د پاکستان د کورنیو چارو وزیر په خپلو خبرو کې ادعا کړې: «نړۍ باید پوه شي چې د دې بریدونو تر شا د هند لاس دی. هند د دې بریدونو طرحه جوړه کړې، موږ به یې په اړه پلټنې وکړو او له ترهګرو او د هغوی له ملاتړو څخه به یې غچ واخلو».
د بلوچستان اعلی وزیر سرفراز بګټي ادعا کړې، چې وسلهوال په ګوادر کې د ګراکرانو استوګنځي ته ننوتلي او د بلوڅانو د کورنیو ګڼ غړي یې هم وژلي دي.
بګټي زیاته کړې:«دا ډول لس نور بریدونه هم زموږ هوډ نهشي کمزوری کولی».
له دې سره سم، د پاکستان د اطلاعاتو فدرالي وزیر عطالله تارړ ویلي، چې د بلوچستان بریدونو ته یې پر وخت ځواب ورکړی او ادعا یې کړې، چې له ۹۲ ډېر وسلهوال یې وژلي دي.
هند لا تر اوسه د پاکستان د دغو ادعاوو په تړاو څه غبرګون نهدی ښودلی، خو تر دې مخکې یې د پاکستان دغه ډول تورونه په کلکه رد کړي دي.
