د ایران کورنیو رسنیو د شنبې په ورځ راپور ورکړ، چې په بندر عباس کې په یوه استوګنیزه ودانۍ کې یوه لویه چاودنه شوې ده. د چاودنې څخه خپاره شوي انځورونه ښیې چې د یوې ودانۍ لږ تر لږه درې پوړونه په پراخه کچه ویجاړ شوي دي. د ودانۍ شاوخوا یو شمیر موټرونه هم زیانمن شوي دي.
په ورته وخت کې راپورونه خپاره شول، چې د انقلابي ګارد د سمندري ځواکونو قوماندان علیرضا تنګسیري وژل شوی دی خو د سپاه پاسداران اړوند تسنیم خبري اژانس دا خبر رد کړ.
د هرمزګان د ولایتي ناورین مدیریت دفتر عمومي رییس وویل، چې په چاودنه کې یو کس وژل شوی او ۱۴ نور ټپیان شوي دي.
د هغه په وینا، د چاودنې لامل لاهم تر څیړنې لاندې دی.
د هرمزګان د طبي علومو پوهنتون رییس هم اعلان وکړ، چې په چاودنه کې شاوخوا ۱۰ کسان ټپیان شوي دي.
د سپاه پاسداران سمندري ځواکونو وویل، چې په هرمزګان کې د سپاه پاسداران سمندري ځواکونو په مرکزي دفتر باندې د ډرون برید نه دی شوی او د دې ځواک سره تړلې هیڅ ودانۍ ته زیان نه دی رسیدلی.
دا چاودنه په داسې وخت کې وشوه چې په منځني ختیځ کې د امریکا د جنګي بېړیو د ځای پرځای کولو او د ایران په وړاندې د ډونالډ ټرمپ د ګواښونو وروسته په سیمه کې تاوتریخوالی زیات شوی دی.
