د پنجشېر لپاره د طالبانو د امنیه قومندانۍ مسوولین وايي، د دغه ولایت د شتل ولسوالۍ د لارې په اوږدو کې د یوې ټرافیکي پېښې له امله ۵ کسان ټپیان شوي دي. د مسوولینو په وینا، د یوه ټپي روغتیايي وضعیت ډېر نازک دی.
د پنجشېر لپاره د طالبانو د امنیه قومندانۍ ویاند حقمل سعد وايي، دغه پېښه د شنبې په ورځ (د سلواغې ۱۱مه) د شتل ولسوالۍ د لارې په اوږدو کې هغه مهال رامنځته شوه چې یوه کرولا موټر د بل ورته موټر مخه بنده کړه او قید شوی موټر سیند ته ولوېده.
د نوموړي په وینا، د پېښې د رامنځته کېدو عامل له پېښې وروسته له سیمې تښتېدلی وو، خو د لانسنګ سیمه کې نیول شوی او تر څېړنو وروسته به له سرغړوونکي سره قانوني چلند وشي.
