شوبانکر میشرا: افغان کرېکټ لوبډلې بیا ځان په نړیوالو سیالیو کې ثابت کړ
د کرېکټ هندي مبصر شوبانکر میشرا د افغانستان نولس کلنې ملي لوبډلې د بریا هرکلی کړی، چې ایرلینډ ته یې ماتې ورکړه او د نړیوال جام نیمه پایلوبې ته یې لار ومونده. نوموړی وایي، دا بریا ښيي چې افغانستان د اسیا دویمه بهترینه لوبډله ده او په لویو ایونټونو کې ځان ثابتوي.
شوبانکر میشرا په خپل فیسبوک پوسټ کې په پښتو لیکلي: «د افغانستان نولس کلنې ملي لوبډلې ایرلینډ ته ماته ورکړه او د نړیوال جام نیمه پایلوبې ته یې لار وموندله. د افغانستان ګران ولس ته دې ډېر ډېر مبارک وي.»
نوموړي همدا راز لیکلي، دې بریا یو ځل بیا زما خبره رښتیا کړه چې افغانستان رېښتیا هم د اسیا دویمه بهترینه لوبډله ده.
نوموړي زیاته کړې: « لویې لوبډلې په لویو ایونټونو کې ځان ثابتوي، او افغانستان یو ځل بیا ځان ثابت کړ».
شوبانکر میشرا ټينګار کړی چې هیله لري افغان لوبډله به د کرکټ په ډګر کې همداسې مخ پر وړاندې لاړه شي او نورې سترې بریاوې به ترلاسه کړي.
تر دې وړاندې د کرکټ نړیوالې شورا له وړاندې د ۱۹ کلنو نړیوال جام تر سیالیو مخکې تحلیلي راپور خپور کړی و، چې په کې د ځینو لوبغاړو وړتیاوې او د ځلېدو امکان ښودل شوی و.
له افغانستان یوازې فیصل خان په دې راپور کې یاد شوی و، چې په دغه سیالیو کې په ځانګړي ډول وځلېد. فیصل خان د نولس کلنو نړیوال جام په یوه لوبه کې د ۱۶۳ منډو په جوړولو سره لومړی افغان لوبغاړی شو چې داسې بریا ترلاسه کوي.
