د اسراییلي رسنیو د راپورونو لهمخې، د دغه هېواد لوړپوړو پوځي چارواکو تایید کړې ده چې د غزې په جګړه کې شاوخوا ۷۰ زره فلسطینیان وژل شوي دي. دا په داسې حال کې ده چې تر دې وړاندې اسراییلي چارواکو د غزې د روغتیا وزارت له لوري اعلان شوې د مرګژوبلې شمېرې ناسمې بللې.
له دې سره، د ملګرو ملتونو هم له ډېرې مودې راهیسې د غزې د روغتیایي بنسټونو له خوا ثبت شوې شمېرې دقیقې بللې دي، خو اسراییل تل پر دغو ارقامو شک درلود او استدلال یې کاوه چې د غزې د روغتیا وزارت د حماس تر ادارې لاندې دی او د باور وړ نه دی.
د غزې د روغتیا وزارت د تازه شمېرو په وړاندې کولو سره، په غزه کې د قربانیانو ټولییز شمېر له ۷۱ زرو څخه زیات ښودلی دی؛ په دې شمېره کې هغه څه باندې ۴۸۰ کسان هم شامل دي چې د اکټوبر په میاشت کې د امریکا په منځګړیتوب له شوي اوربند راهیسې د اسراییل په بریدونو کې وژل شوي دي.
د غزې د روغتیا وزارت په وینا، په غزه کې د قربانیانو ډېره برخه ښځې او ماشومان دي او په زرګونو نور کسان هم تر خاورو او کنډوالو لاندې دي او تري تم پاتې دي.
د اسراییل «ینت» خبري وېبپاڼې او څو نورو معتبرو رسنیو د دغه هېواد له لوړپوړو پوځي چارواکو سره د پنجشنبې ورځې ناستې ته په اشارې راپور ورکړی، چې پوځ ورته شمېرې منلې دي.
د «ینت» خبري وېبپاڼې د دغه هېواد د یوه رسمي چارواکي له قوله راپور ورکړی: «زموږ د ارزونې لهمخې، د جګړې پر مهال د تري تم شویو کسانو له شمېر پرته، د غزې شاوخوا ۷۰ زره اوسېدونکي وژل شوي دي».
دغه چارواکي زیاته کړې ده: «دمګړی د وسلهوالو ډلو د غړو او هغو کسانو ترمنځ چې په جګړه کې یې لاس نه درلود، د توپیر او جلا کولو پر کار بوخت یو».
د دغو راپورونو په غبرګون کې، د اسراییل پوځ اعلان وکړ چې «خپاره شوي جزییات د اسراییل د دفاعي ځواکونو رسمي معلومات نه منعکس کوي.» دغه بنسټ زیاته کړه: «په دې اړه هر ډول راپور یا معلومات به د رسمي او منظمو چینلونو له لارې خپاره شي».
د امریکا د خزانهدارۍ وزارت د جمعې په ورځ (د سلواغې ۱۰مه) د یوې خبرپاڼې په خپرولو سره د ایران حکومت ته د «رژیم» په خطاب کولو سره په دغه هېواد کې د معترضینو ځپنه «وحشیانه» بللې او یاد چارواکي یې د زرګونه معترضینو د وژنې مسوولین ګڼلي دي.
په دغو تحریم شویو کسانو کې د ایران د کورنیو چار وزیر سکندر مومني، د سپاه پاسداران د اطلاعاتو سازمان مسوول مجید خادمي، په تهران کې د سپاه سیدالشهدا قومندان قربان محمد ولیزاده، په همدان کې د سپاه پاسداران قومندان حسین کمالي، په ګیلان کې د سپاه پاسداران قومندان حمید دمغاني، د کرامانشاه ولایت لپاره د لبنان د وسلهوالو ځواکونو قومندان مهدي حاجیان شامل دي.
د امریکا د خزانهدارۍ وزارت وايي، یاد کسان د زرګونه معترضینو د وژنې مسوولین دي او له اعتراض کوونکو سره یې تر ټولو ډېر بد چلند کړی او ان دا چې پر معترضینو یې د مخامخ ډزو امر هم کړی دی.
له دې سربېره یو ایران پانګهوال بابک مرتضی زنجاني هم تحریم شوی او د امریکا په وینا، یاد کس د ایران له نفتي موادو ترلاسه شوي میلیاردونه ډالره چې اصلا د ایران ولس حق کېږي، اختلاس کړي او همداراز هغه یې د سپاه پاسداران یو له مهمو مالي تمویلوونکو بللی دی.
د دغه وزارت د معلوماتو لهمخې، بابک مرتضی زنجاني چې د میلمستونونو، ټرانسپورټ، ټېکنالوژۍ، مالي خدماتي چارو او همداراز د نفتي موادو پر صادراتو بوخت دی په ۲۰۱۶ کال کې په نفتي موادو کې د میلیاردونو ډالرو د اختلاس له امله په اعدام محکوم شو، خو په ۲۰۲۴ کال کې یې په حکم کې تخفیف راغی او د سپاه پاسداران یو له مهمو مالي تمویلوونکو دی.
د یاد وزارت په خبرپاڼه کې راغلي، د یادو کسانو ټولې هغه شتمنۍ چې په امریکا او یا هم د امریکایانو په واک کې دي کنګل شوي او هغه کسان او بنسټونه به چې ورسره په مستقیم او غېر مستقیم ډول اړیکې ولري له ورته چلند سره مخ شي.
د امریکا د خزانهدارۍ وزیر اسکاټ بنسټ ویلي: «د سوکاله ایران د جوړولو پر ځای، رژيم پرېکړه کړې چې د دغه هېواد نفتي عواید د اټومي او توغندیزو چارو پر پراخولو او په ټوله نړۍ کې د نیابتي ترهګرو ډلو پر ملاتړ ولګوي».
د یادونې وړ ده، چې دغه وزارت تېر کال هم د ایران په نفتي چارو کې ښکېل ۸۷۵ کسان تحریم کړي وو.
