په هلمند کې د طالبانو رسنیز دفتر ویلي، د بهرامچې له لارې په قاچاقي توګه راوړل شوي زرګونه کیلوګرامه درمل، چاکلېټ او اچار تر ترلاسه کېدو وروسته پرون وسوځول شول. یاد دفتر د مبدا هېواد د نوم په اړه څه نهدي ویلي، خو تر دې مخکې دغه ډول توکي له پاکستان څخه واردېدل.
د هلمند د رسنیو دفتر د شنبې په ورځ (د سلواغې ۱۱) د یوې خبرپاڼې په خپرولو سره ویلي، دغه مواد چې پهکې ۲۵۴۵ کیلوګرامه انساني درمل، ۳۰۷۲ کیلوګرامه چاکلېټ او ۳۰۵۲ کیلوګرامه اچار شامل وو، څه موده مخکې د ځینو کسانو له لوري په قاچاقي ډول هېواد راوړل شوي وو.
په خبرپاڼه کې د یادو توکو د مبدا یا صادروونکي هېواد د نوم په اړه څه نهدي ویل شوي، خو تر دې مخکې له یادې لارې له پاکستان څخه واردات او صادرات کېدل.
له شاوخوا درېیو میاشتو راهیسې د افغانستان او پاکستان تر منځ هر ډول سوداګري په ټپه درول شوې او اوس یو شمېر کسان هڅې کوي په قاچاقي توګه دواړو خواو ته د اړتیا وړ مواد ولېږدوي.
